पोखरा । गण्डकी प्रदेशसभाको सोमबारको बैठक शोक प्रस्ताव पारित गरेर सकिएको छ । सोमबारैदेखि गण्डकी प्रदेशसभाको हिउँदे अधिवेशन सुरु भएको हो ।

बैठकमा मुख्यमन्त्री सुरेन्द्रराज पाण्डेले प्रदेश निजामती सेवा ऐन, २०७९ संशोधन गर्न बनेको अध्यादेश टेबल गरे ।

त्यसपछि प्रदेशसभा सदस्य विमला गौचनको निधनमा शोक प्रस्ताव पारित गरेर बैठक स्थगन गरिएको हो । सभामुख कृष्ण धितालले अर्को बैठक माघ ३० गते बस्ने जानकारी गराए ।

गण्डकी प्रदेशसभामा सांकेतिक भाषाको दोभासे व्यवस्था गरिएको छ । सांसद सुनीता थापाको सहजताका निम्ति प्रदेशसभा सचिवालयले दोभासेको व्यवस्था गरेको हो ।

प्रदेश सांसद विमला गौचनको निधनपछि मनोनीत सदस्य थापा श्रवणविहीन भएका कारण सचिवालयले ज्यालादारीमा दोभासे राखेको छ । समानुपातिक सदस्यमा मनोनीत थापा सोमबार पहिलोपटक प्रदेशसभा बैठकमा सहभागी भइन् ।