काठमाडौं । भारतीय क्रिकेट टिमका मुख्य प्रशिक्षक गौतम गम्भीरले च्याम्पियन्स ट्रफीमा कप्तान रोहित शर्मा र ब्याटर विराट कोहलीको महत्त्वपूर्ण जिम्मेवारी रहेको बताएका छन् ।

पाकिस्तानमा हुने च्याम्पियन्स ट्रफी यसै महिनादेखि सुरु हुने भए पनि रोहित र विराट दुवै स्वभाविक लयमा छैनन् । घरेलु मैदानमा भएको न्युजिल्यान्डसँगको टेस्ट शृंखलामा ‘ह्वाइट वास’ हुँदा र अस्ट्रेलियासँग बोर्डर–गाभास्कर ट्रफीमा ३–१ ले शृंखला गुमाउँदा यी दुवै ब्याटरको प्रदर्शन निराशजनक थियो । यसपछि रोहित र विराट स्वभाविक लयमा फर्किन घरेलु क्रिकेट लिग रणजी ट्रफीमा फर्किएका छन् ।

स्वभाविक लयका निम्ति संघर्षरत हुँदा पनि प्रशिक्षक गम्भीर भने दुवै ब्याटरको बचाउमा उत्रिए ।

“मलाई लाग्छ रोहित र विराटले ड्रेसिङ रुम र भारतीय क्रिकेट टिममा ठूलो अर्थ राख्दछन् । उनीहरूले च्याम्पियन्स ट्रफीका निम्ति महत्वपूर्ण जिम्मेवारी पाएका छन्,” गम्भीरले भने, “मैले पहिले पनि भन्ने गरेको छु, यी दुवै ब्याटर निक्कै भोको छन्, देशका निम्ति खेल्न चाहन्छन् । उनीहरुमा राष्ट्रबाट खेल्न र राष्ट्रलाई केही दिनका निम्ति ठूलो लगाव छ ।”

फेब्रुअरी १९ देखि सुरु हुने प्रतियोगितामा भारत समूह ‘ए’ मा छ । यो समूहमा भारतसँगै बंगलादेश, पाकिस्तान र न्युजिल्यान्ड छन् । भारतले २० फेब्रुअरीमा बंगलादेशविरुद्ध खेल्दै प्रतियोगिताको सुरुआत गर्नेछ ।