काठमाडौं । राष्ट्रियसभामा नेकपा (एमाले)का सांसद गोपाल भट्टराईले देशमा लगानीको वातावरण सिर्जना गर्न र अर्थतन्त्र चलायमान बनाउन अध्यादेश ल्याइएको बताएका छन् । आइतबार राष्ट्रियसभा बैठकमा उनले यस्तो बताएका हुन् ।

विगतमा सदन बन्द गरिएको भोलिपल्टै पार्टी फुटाउन अध्यादेश ल्याइएको उनले उल्लेख गरे । अध्यादेशको नियत सही हुनुपर्नेमा उनले जोड दिए ।

उनले अध्यादेशबाटै जन्मिएको पार्टीले यसको विरोध गर्नु उचित नहुने धारणा राखे । उनले भने, “विगतमा आज सदन बन्द गर्ने र भोलि अध्यादेश ल्याएर पार्टी फुटाउने काम भएको होइन र ? मलाई त अचम्म के लाग्छ भने, अध्यादेशबाटै जन्मिएको पार्टीले अध्यादेशको सबैभन्दा बढ्ता विरोध गरेको छ । ल्याउनु हुँदैन थियो भन्न मिल्छ र ?”

कानुन झन्झटिला, विदेशी तथा स्वदेशी लगानी नआएको, फाइलहरू महिनौँ रोकिनेलगायत झन्झट धेरै भएकाले सरकारले अध्यादेश ल्याएको उनको भनाइ थियो । “सरकारले जनतालाई केही डेलिभरी दिनुपर्ने आवश्यकता देख्यो र अध्यादेश ल्यायो । हामीले सदनमा भनेका हौँ– कानुन झन्झटिला भए, विदेशी तथा स्वदेशी लगानी आउन सकेनन्, फाइलहरू महिनौँ रोकिनेलगायत झन्झट धेरै भयो । लगानीकर्ता आकर्षित हुन सकेनौँ भन्यौँ । त्यसको लागि सात दिनभित्र टुंगो लगाउनुपर्छ भन्दा बेठिक भयो र ?,” उनले प्रश्न गरे ।

सांसद भट्टराईले अध्यादेश ल्याइयो भन्नु भन्दा यसको कार्यान्वयनमा जोड दिन सरकारलाई दबाब बढाउनुपर्ने बताए । न्युज एजेन्सी नेपालबाट ।