काठमाडौं । पश्चिम नवलरासीमा लागुऔषध कारोबारीलाई समाउन प्रहरीले गोली चलाएको छ । बिहीबार (हिजो) बेलुका करिब ८ बजे प्रहरीले गोली चलाउँदा एक लागुऔषध कारोबारी घाइते भएका छन् । उनलाई पक्राउ गरिएको छ ।

पक्राउ पर्नेमा सोही स्थानका ५२ वर्षीय राजेश लोनिया रहेका केन्द्रीय प्रहरी प्रवक्ता एवं डीआईजी दिनेशकुमार आचार्यले बाह्रखरीलाई जानकारी दिए । 

लोनियाको खुट्टाको माथिल्लो भागमा गोली लागेको छ । अर्का एक व्यक्ति फरार छन् । लागुऔषध कारोबारीले प्रहरीमाथि गोली हान्ने प्रयास गरेपछि प्रतिकार गरिएको प्रवक्ता आचार्यले जानकारी दिए । 

रामग्राम नगरपालिका–१२, पचगाँवामा प्रहरीले चार राउन्ड गोली चलाएको थियो । लोनियाको घरबाट लागुऔषध नियन्त्रणमा लिन प्रहरीले गोली प्रहार गरेको थियो । उनले घरमा लागुऔषध राखेको सूचना पाएपछि प्रहरीको पाँचजनाको टोली त्यहाँ पुगेको थियो ।

लागुऔषध नियन्त्रण ब्युरो शाखा कार्यालय भैरहवाबाट खटिएको प्रहरी टोलीले परिचय दिएर खानतलासी गर्दा लोनियाले आक्रमण गर्न खोजेका थिए । त्यसपछि उनी भाग्ने प्रयासमा थिए । सोही क्रममा प्रहरीले गोली प्रहार गरेको थियो ।

लोनियाको बायाँ साप्रामा एक राउन्ड गोली लाग्दा उनी घाइते भएका जिल्ला प्रहरी कार्यालय नवलपरासीका सूचना अधिकारी एवं डीएसपी रेशम बोहराले राससलाई जानकारी दिएका छन् ।

जिल्लास्थित पृथ्वीचन्द्र अस्पतालमा उनको उपचार भइरहेको र अवस्था सामान्य रहेको प्रहरीले जनाएको छ । उक्त स्थानबाट ९३ पुरिया ब्राउनसुगर नियन्त्रणमा लिइएको सूचना अधिकारी बोहराले बताए ।

प्रहरीका अनुसार, फरार एकजना लागुऔषध किनबेचमा संलग्न व्यक्ति हुन् । ती व्यक्तिको खोजी गरिरहेको प्रहरीले जनाएको छ ।