काठमाडौं । उपप्रधान एवं अर्थमन्त्री विष्णुप्रसाद पौडेलले सरकारले अर्थतन्त्रमा देखिएका समस्याहरूलाई किस्ता–किस्तामा समाधान गरी रहेको दाबी गरेका छन् ।

नेपाल चार्टर्स एकाउन्टेन्ट्स संस्था (आइकन)को २८औँ वार्षिकोत्सव समारोहमा बोल्दै अर्थमन्त्री पौडेलले पछिल्लोसमय अर्थतन्त्रमा देखिएका समस्या समाधानको लागि सरकारले किस्ता–किस्तामा समाधान गर्न चाहेको उल्लेख गरे । उनले अर्थतन्त्रलाई चलायमान बनाउँदै मुलुकमा लगानी, उत्पादन, रोजगारीलाई अभिवृद्धि गर्न र विदेशी लगानी आकर्षित गर्नका निम्ति प्रयास गरिरहेको बताए ।

सरकारले आर्थिक क्रियाकलापलाई डिजिटल प्रविधिमा सम्पूर्ण रूपमा निर्भर रहनसक्ने गरी आत्मसाथ गरे पनि वर्तमान नयाँ टेक्नोलोजीका हिसाबले अगाडि बढ्न भने नसकेको जिकिर गरे । कर प्रणालीमा सरकारले चाहेको जस्तो सुधार गर्न अझै नसकेको भन्दै नेपाल चार्टर्स एकाउन्टेन्ट्सहरूले सुधारको लागि आवश्यक सहयोग गर्न आग्रह गरे । उनले कुनै पनि व्यवसायीले कर छल्न नसक्ने खालको कानुन बनाउन नसकिएको बताए ।