काठमाडौं । ‘नेपथ्य’ पुस्तक डिजिटल सञ्जालबाट फैलँदै यो सातादेखि विस्तृत पाठक घेरामा प्रवेश गर्ने भएको छ । तीन दशकभन्दा लामो अवधिदेखि नेपथ्य ब्यान्ड सुनिँदै आएको थियो । अब यसलाई पढ्न पनि सकिने भएको हो । ब्यान्डका मियो अमृत गुरुङसँगको लामो संगतमा लेखक गिरीश गिरीले यो पुस्तक तयार पारेका हुन् ।

बजार व्यवस्थापनमा नयाँ प्रयोग थालनी गरिएको यो किताबलाई यसअघि ‘अनलाइन प्रि अर्डर’मार्फत घरघरमै उपलब्ध गराउने चरण सम्पन्न भइसकेको छ ।

“यो पुस्तकको प्रि अर्डरलाई व्यवस्थापन गर्ने जिम्मेवारी हामीले पाएका थियौँ,” थुप्रै डटकमका राजु गोतामेले भने, “आजसम्मै अनलाइन प्रि अर्डरबाट हामीले बेचेको सबैभन्दा धेरै किताबको रेकर्ड यस पुस्तकले राख्न सफल भइसकेको छ ।”

थुप्रै डटकमका अनुसार, उसको वेबसाइट प्रयोग गरेर डिजिटल भुक्तानीमार्फत दुई सातामै एक हजारभन्दा बढी प्रति पुस्तक बिक्री भएको थियो ।

यसरी इन्टरनेटको घेराबाटै पुस्तक हात पार्ने पाठकको प्रतिक्रिया पनि सामाजिक सञ्जालमा देखिन सुरु भइसकेको छ ।

पुस्तकमा नेपथ्यको जन्म, विभिन्न कालखण्डमा यसको उन्नति र अवनतिदेखि गीतको खोजीमा गरिएका संघर्षको बेलीविस्तार पढ्न सकिन्छ । संगीतबाट अर्जित लोकप्रियतालाई नेपाली समाजको समग्र हितमा कसरी उपयोग गर्न सकिन्छ भनेर गरिएका प्रयत्नको जानकारी पनि यसमा समेटिएको छ ।

यसरी अनलाइन बिक्रीको अध्यायसँगै अब आमपाठकको घेरा समात्न देशभित्र र बाहिरका पुस्तक बिक्री केन्द्रहरूमा यो किताबको प्रवेश हुन हुँदै छ । सांगीतिक टोली नेपथ्य र व्यवस्थापन समूह नेपालयको संगम भएको २५ वर्ष अवसर पारेर यो पुस्तकलाई पब्लिकेसन नेपालयले प्रकाशन गरेको हो ।