काठमाडौं । नेपाल बिमा प्राधिकरणले दुई पुनर्बिमा कम्पनीलाई पुँजी वृद्धि गर्न थप समय दिएको छ । प्राधिकरणले नेपाल पुनर्बिमा कम्पनी र हिमालयन रिइन्स्योरेन्सलाई तोकिएको पुँजी वृद्धि गर्न थप एक वर्ष समय दिने निर्णय गरेको हो ।

पुस २४ गतेको निर्णयअनुसार अब यी दुई पुनर्बिमा कम्पनीले एक वर्षभित्र २० अर्ब चुक्तापुँजी कायम गरे हुन्छ । प्राधिकरणका उप–निर्देशक शम्भुराज लामिछानेका अनुसार पुनर्बिमा कम्पनीहरूलाई पुँजी वृद्धि गर्न थप एक वर्षको समय दिने निर्णय भएको हो ।

यो निर्णयअनुसार अब नेपाल पुनर्बिमा कम्पनी र हिमालयन रि–इन्स्योरेन्सले आगामी २०८२ माघ मसान्तभित्र २० अर्ब चुक्तापुँजी पुर्‍याए हुने भएको छ ।

प्राधिकरणले यही माघ मसान्तसम्म तोकिएको पुँजी पुर्‍याउन निर्देशन दिएको थियो । तर, तोकिएको समयसम्म कम्पनीले चुक्तापुँजी कायम नगरेपछि समय थप गरिएको लामिछाने बताउँछन् ।

हाल नेपाल पुनर्बिमा कम्पनीको चुक्तापुँजी १३ अर्ब ४२ करोड २१ लाख ८७ हजार १०० रुपैयाँ छ । त्यस्तै, हिमालयन रिइन्स्योरेन्सको चुक्तापुँजी १० अर्ब ४० करोड रुपैयाँ रहेको छ ।

नेपाल पुनर्बिमा कम्पनीले पुँजी वृद्धिको योजना प्राधिकरणमा बुझाउन नसक्दा समय थप गर्न परेको हो । सरकारी स्वामित्वमा स्थापना भएको यो कम्पनीमा निर्णय प्रक्रिया लामो भएकाले पनि पुँजी वृद्धिको योजना समयमा बोर्डमा पेस गर्न नसकेको हो ।

हिमालयन रिइन्स्योरेन्सले भने ८० प्रतिशत हकप्रद सेयर जारी गर्ने प्रस्ताव वार्षिक साधारणसभाबाट गरिसकेको छ भने प्राधिकरणले पनि स्वीकृति दिइसकेको छ  ।