असान्दर्भिक भयो भने सही विषयको उठान पनि अस्वाभाविक हुनपुग्छ ।  चिनियाँ नयाँ वर्षका अवसरमा काठमाडौं स्थित चिनियाँ दूतावासले ठमेलमा बसन्त उत्सव मनाउन अनुमति मागेको थियो । त्यसको उत्तरमा काठमाडौं महानगरपालिकाले दूतावासलाई चक्रपथको कलङ्की-महाराजगन्ज खण्डमा कार्यक्रम आयोजना गर्नु भनेर स्थान तोकिदियो । 

ठमेल क्षेत्र पर्यटन आकर्षणको केन्द्र त हुँदै हो केही वर्ष यता चिनियाँ व्यापार केन्द्र पनि बन्न पुगेको छ । साथै, पर्यटक लक्षित उत्सव वा कार्यक्रमहरू अधिकांशतः ठमेलमै आयोजना हुँदै पनि आएका छन् । यसैले ठमेल क्षेत्रमा महोत्सव आयोजना गर्न चिनियाँ राजदूतावासको चाहना हुनु अत्यन्त स्वाभाविक हो । 

अर्कोतिर, महानगरपालिकाले देखाएको चक्रपथको कलङ्की-महाराजगन्ज खण्डमा थालिएको सडक सुधारको काम वर्षौंदेखि अधुरो रहेको छ । संयोग, त्यो सडकखण्ड सुधारको ठेक्का चिनियाँ कम्पनी साङघाई कन्स्ट्रक्सनले लिएको छ । ठेकेदार कम्पनीले सडक सुधारको काम सम्पन्न नगर्दा चक्रपथका यात्रुका साथै स्थानीयले पनि सास्ती भोगेका छन् । 

सडक सुधारको काम अधरो राखेकोमा स्थानीय जनता आक्रोशित छन् । ठेकेदार कम्पनी चिनियाँ भएकाले सायद काठमाडौं महानगरपालिकाले यो जनआक्रोश चिनियाँ दूतावासमाथि प्रकट गरेको हुनुपर्छ । महोत्सवका लागि कलङ्की-महाराजगन्ज खण्डको धुलाम्य सडक देखाउनुमा महानगरपालिकाको व्यङ्ग्य र आक्रोश झल्कन्छ । यसलाई मनन गरेर चिनियाँ पक्षले सहजरूपमा लिनु मित्रवत् व्यवहार हुनेछ ।

विडम्बना, काठमाडौं महानगरपालिकाका पदाधिकारीको व्यङ्ग्य चेत अकूटनीतिक र अनुचित शैलीमा कुसमयमा प्रकट भयो । महोत्सव सकिएपछि महानगरपालिकाले शिष्ट तथा कूटनीतिकरूपमा यही व्यङ्ग्य गरेको भए सायद त्यसले चिनियाँ पक्षलाई संवेदित बनाउन पनि सक्थ्यो ।

स्मरणीय छ, सन् २०२५ मा नेपाल-चीन दौत्य सम्बन्ध स्थापित भएको ७० औं वार्षिकोत्सव मनाउने र त्यस क्रममा चीनले २०२५ मा नेपाल भ्रमण गर्न आफ्ना नागरिकहरूलाई प्रेरित गर्ने कार्यक्रम रहेको छ । चिनियाँ पर्यटकको प्राथमिकतामा नेपाल पर्न सक्यो भने त्यसको पहिलो लाभ त काठमाडौंलाई नै हुने हो ।

जे नहुनु पर्ने थियो त्यो त भई नै सक्यो । अब गर्ने त क्षति कम गर्ने उपाय न हो । यसैले काठमाडौं महानगरपालिकाको यस अकूटनीतिक शैलीबाट चिनियाँ मित्रहरूको चित्त नदुखोस् भन्नेमा नेपाल  सरकार विशेष सगज र संवेदनशील हुनुपर्छ । काठमाडौं महानगरपालिकाले पनि गल्ती सुधार्न माफी माग्नसमेत हिचकिचाउनु हुँदैन । 

काठमाडौं महानगरपालिका जिम्मेवार स्थानीय सरकार हो । राजधानीको महानगरपालिका भएकाले यसको जिम्मेवारी अरूभन्दा बढी नै हुन्छ । यस्तो निकायमा काम गर्ने कर्मचारी र जनप्रतिनिधिले उर्बौलो व्यवहार गर्दा देशकै लागि प्रत्युत्पादक हुनसक्छ । सही विषय उठाउन पनि समय, सन्दर्भ, शैली भने कूटनीतिक, मर्यादित र संयमित हुनुपर्छ भन्ने सधैँ हेक्का रहोस् ।