काठमाडौं । लेखक छुदेन काविमोको उपन्यास ‘उरमाल’ एक समारोहबीच लोकार्पण गरिएको छ । प्रज्ञा–प्रतिष्ठानमा आयोजित कार्यक्रममा मानवशास्त्री सुरेश ढकाल तथा उपन्यासकार छुदेनले संयुक्त रूपमा पुस्तक लोकार्पण गरेका हुन् । 

उक्त अवसरमा कृतिकार छुदेनसँग मानवशास्त्री ढकालले संवाद गरे । संवादमा ढकालले ‘उरमाल’ उपन्यासले चिया उमार्नेहरूको कथा अर्थात् चिया टिप्ने श्रमिकहरूको जीवनका दुःख र संघर्षको कथा पस्किएको बताए । 

“मैले प्रत्येक दिन दुईतीन कप चिया पिउँछु, यस अर्थमा म चियाको पारखी हुँ भन्न मिल्ला । यसरी वर्षमा हजार कप चिया पिइरहे पनि मैले कहिल्यै चिया उमार्नेहरूबारे सोचेको रहेनछु । ‘उरमाल’ पढेपछि भने मलाई यसले झस्कायो,”  उनले भने । 

धेरैका आँखामा नपरेको तर लेखिनुपर्ने विषयलाई लेखक छुदेनले उपन्यासमा ल्याएको ढकालले बताएको फाइन प्रिन्टले जारी गरेको विज्ञप्तिमा उल्लेख छ । 
  
‘उरमाल’मा आफूले चिया श्रमिकहरूका सुस्केराको कथालाई समेटेको लेखक छुदेन काविमाको भनाइ छ । “जसका सङ्घर्ष त हजारौं छन् तर चैन थोरै पनि छैन । सपना त लाखौँ छन् । तर, सुख अलिकति पनि छैन । जहिल्यै दुःखको कथालाई मनमा बोकेर हिँड्नेहरूको जीवनको पीडालाई नै मैले उपन्यासमार्फत देखाउने कोसिस गरेको छु,” उनको भनाइ छ ।
 
‘उरमाल’ झर्रा आदिवासी कथा रहेको बताइएको छ । चियाको बोटसँग माया साटेर पुस्तौंदेखि धरमराइरहन विवश श्रमिकहरूको उच्छ्वासको कथा भएको लेखकको भनाइ छ । 

भारतको कालेबुङमा जन्मिएका छुदेन काविमो नेपालीभाषी आख्यानकार हुन् । उनको कथासङ्ग्रह १९८६ ले सन् २०१८ को युवा साहित्य अकादमी पुरस्कार पाएको छ । उनको पहिलो उपन्यास ‘फातसुङ’ अङ्ग्रेजी, बाङ्ला, सिन्धी र हिन्दी भाषामा समेत अनूदित छ । 

नेपाल, भारत र बेलायतबाट प्रकाशित अङ्ग्रेजी संस्करण ‘सङ अफ द स्वयल’ भारतको प्रतिष्ठित जेसिबी पुरस्कार २०२२ का लागि सर्टलिस्ट भएको प्रेस विज्ञप्तिमा उल्लेख छ ।