काठमाडौं । संघीय संसद्अन्तर्गत तीन समितिको बैठक आज बस्दै छ ।

बिहान साढे १० बजे राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठक बस्ने तय छ । बैठकमा नेपालको संविधानको धारा ५३ बमोजिम संघीय संसद्‌मा प्रस्तुत सरकारको वार्षिक प्रतिवेदन (आ.व. २०७९/०८०)का विषयमा छलफल गरिनेछ ।

राष्ट्रियसभाअन्तर्गतको सार्वजनिक नीति तथा प्रत्यायोजित विधायन समितिको बैठक बिहान साढे ११ बजे बस्दै छ । बैठकमा त्रिभुवन विश्वविद्यालय ऐन, २०४९ को प्रत्यायोजित विधायनबारे छलफल गर्ने कार्यसूची छ ।

दिउँसो २ बजे विधायन व्यवस्थापन समितिको बैठक बस्नेछ । बैठकमा तिलगंगा नेत्र विश्वविद्यालय विधेयक, २०८१ का विषयमा महान्यायाधिवक्तासँग छलफल गरिने संसद् सचिवालयले जनाएको छ ।

सिंहदरबारस्थित संसदीय समितिको सभाकक्षमा बैठक बस्नेछ ।