काठमाडौं ।  नेपाली कांग्रेसका नेता डा. शेखर कोइरालाले नेपालको शान्ति प्रक्रियाका लागि राष्ट्रसंघीय मिसन (अनमिन)का प्रथम प्रमुख इयान मार्टिनसँग भेटवार्ता गरेका छन् । 

बेलायत भ्रमणमा रहेका डा. कोइरालाले नेपालको शान्ति प्रक्रियामम महत्वपूर्ण सुरुआती भूमिका खेलेको अनमिनका नेपाल प्रमुख मार्टिनबीच भएको भेटवार्तामा नेपालको शान्ति प्रक्रियासहितका विषयमा छलफल भएको कोइरालाको सचिवालयले जनाएको छ । 

भेटमा मार्टिनले नेपालको शान्ति प्रक्रिया अझै नटुंगिएको भन्दै चिन्ता जाहेर गरेका थिए । कोइरालासँगको भेटमा शान्ति प्रक्रिया जतिसक्दो छिटो टुंग्याउन आग्रह गर्दै  मार्टिनले लामो समयसम्म राख्दा त्यसले नकारात्मक परिणाम दिनसक्ने बताए । 

तत्कालीन विद्रोही माओवादी निर्वाचन प्रक्रियामा प्रवेश गरिसकेको र अहिले नेपालमा कुनै पनि हिंसा नरहेकाले संक्रमणकालीन न्यायका बाँकी काम सक्नुपर्ने उनको सुझाव छ । 

राष्ट्रसंघीय मिसन प्रमुख हुँदा मार्टिनले माओवादी लडाकुलाई एकमुष्ट समायोजनको प्रस्ताव राख्दै सार्वजनिक भाषणबाजीमा उत्रिएपछि अन्तिम समयमा विवादित बनेका थिए । उनी विवादित बनेपछि कांग्रेसका तत्कालीन सभापति गिरपजाप्रसाद कोइरालाले माओवादी लडाकुहरूलाई राष्ट्रसंघको शान्ति मिसनमा लैजान आग्रह गरेका थिए । 

कोइरालाको आग्रहपछि पुनः प्रतिवादमा उत्रिएका मार्टिनका विषयमा राष्ट्रसंघमा तत्कालीन महासचिव वान कि मुनको नेपाल भ्रमणमा प्रश्न उठाएपछि अनमिनमा मार्टिनको ठाउँमा करिन लेनग्रेन पठाइएको थियो ।

यसैबीच, कोइरालाले बेलायती कन्जरभेटिभ पार्टीका नेता एवं बेलायतका पूर्वविदेशमन्त्री जेम्स क्लेभर्लीबीच भेटवार्ता गरेका छन् । भेटमा कोइराला र क्लेभर्लीबीच नेपाल–बेलायत सम्बन्ध, आपसी सहयोग, दुईपक्षीय हितसहितका विषयमा छलफल छ । 

कोइरालाले नेपालमा बेलायती सहयोगमार्फत बनेका आयोजनाको निरन्तरता र थप सहयोगका निम्ति आग्रह गरेका थिए ।