काठमाडौं । प्रधानमन्त्री तथा नेकपा (एमाले)का अध्यक्ष केपी शर्मा ओलीले विद्यार्थी संगठन अनेरास्ववियुलाई प्रचारको बाढी ल्याउन निर्देशन दिएका छन् । पार्टी कार्यालय च्यासलमा आयोजित अनेरास्ववियुको कार्यशालामा उनले सामाजिक सञ्जालमा आक्रामक शैलीमा प्रस्तुत हुन निर्देशन दिए । 

“हाम्रा साथीहरूलाई एग्रिसिभ्ली अघि बढ्न आग्रह गर्छु । हामी मुड्कीको राजनीति गर्दैनौँ । तर, काममा, सक्रियतामा, प्रचारप्रसारमा एग्रेसिभ,” ओलीले भने । 

उनले पत्रपत्रिकामा आएको कुरामा  ध्यान नदिई हातमा भएको मोबालबाट प्रचार गर्न निर्देशन दिए । “पत्रपत्रिकामा के आयो भने छाडिदिनुस्, युट्युबमा के आयो भनेर छोडिदिनुस् । अनेरास्ववियुको प्रचारको समुन्द्र, बाढी बगाउनुस् न, मोबाइलमा । अरू चाहिँदैन,  अनेरास्ववियुको आवाजले नै धान्छ,” ओलीले भने ।

उनले मोबाइलबाट आएको आवाजले प्रचार अभियान यस्तो हुँदोरहेछ भनेर दुनियालाई आश्चर्यचकित बनाउन निर्देशन दिए । 

“टिकटकमा अरूले मौका नै नपाउने गरी सधैँ एमालेले भर्ने बनाइदिनुस् न,” ओलीले भने , “अरूको हेर्नै नभ्याउने गरी खोल्ने बित्तिकै एमाले, एमाले, अनेरास्ववियु, अनेरास्ववियु...।”

उनले फागुन १५ गते हुने स्ववियु निर्वाचनमा जितको शुभकामना दिए । अनेरास्ववियुले हार्न नजानेको दाबी गरे । उनले एमालेमा युवा छैनन् भन्ने प्रचारको जवाफ निर्वाचनले दिनुपर्ने बताए । 

“एउटा कुरा सावित गर्नुछ यसपटक । एमालेसँग युवा छैनन्, कोसँग युवा रहेछन् ? फागुन १५ गते जाँभेर हेरौँ पञ्जा लडाइँ हेरौँ । कोसँग रहेछन् युवा, कोसँग रहेनछन्,” ओलीले भने, “केही केही न संगठन छ, न केही छ, अर्काले फुकेका बेलुन । तीसँग डराउनुपर्दैन । हामी लाखौँ छौँ ।”