विराटनगर । मोरङको धनपालथानस्थित उमागौरी सहकारी संस्थाको रकम अपचलन तथा मुद्दामा आरोपित सार्वजनिक लेखा समिति सभापति ऋषिकेश पोखरेलकी श्रीमती अञ्जला कोइराला १० लाख रुपैयाँ धरौटी बुझाएर थुनामुक्त भएकी छन् ।

सहकारीको २२ करोड ४८ लाख २७ हजार ७०० रूपैयाँ रकम अपचलन तथा ठगी आरोपमा जिल्ला सरकारी वकिलको कार्यालय मोरङले गत मंसिर २७ गते मुद्दा दायर गरेको थियो । उनीविरुद्ध उच्च अदालतले पक्राउ पुर्जी जारी गरेको थियो । बुधबार बयानका लागि कोइराला जिल्ला अदालत मोरङमा उपस्थित भएकी थिइन् ।

जिल्ला अदालतका न्यायाधीश उद्धवप्रसाद भट्टराईको इजलासमा बयानपछि थुनछेक बहस भएको थियो । इजलासले १० लाख रुपैयाँ धरौटीमा छाड्न आदेश दिएको थियो । कोइरालाले धरौटी बुझाएको अदालतका सूचना अधिकारी हेमबहादुर बुढाथोकीले बताए ।

अदालतमा बयान दिँदै अञ्जलाले कुनै दायित्व आफूसँग नरहनेगरी सहकारीको सञ्चालक समितिबाट राजीनामा दिएको र सञ्चालक समितिको कुनै पनि माइन्युटमा हस्ताक्षर नगरेको दाबी गरेको आदेशमा उल्लेख छ । राजीनामा नदिई दायित्व नरहनेगरी प्रतिवादी अञ्जलाले राजीनामा दिएकोले थुनामा राखेर पुर्पक्ष गर्नुपर्ने नदेखिएको आदेशमा उल्लेख छ । यो प्रकरणमा २५ जनाविरुद्ध मुद्दा दायर भएको थियो ।

धनपालथान–४ का पूर्ववडाध्यक्ष रोशन राजवंशीलाई भने अदालतले पुर्पक्षका लागि जेल चलान गरेको थियो । रंगेली नगरपालिका वडा नम्बर २ का बहालवाला वडाध्यक्ष सन्तलाल खवासलाई पनि अदालतले पाँच लाख रुपैयाँ धरौटीमा छाडेको थियो ।