काठमाडौं । बंगलादेशको सरकारले पूर्वप्रधानमन्त्री शेख हसिनासहित ९७ जनाको राहदानी रद्द गरेको छ ।

बंगलादेशको समाचार एजेन्सी बीएसएसका अनुसार, तीमध्ये २२ राहदानी जबरजस्ती बेपत्ता पारिएका व्यक्तिका छन् । हसिनासहित अन्य ७५ जनाको गत जुलाईमा भएको हत्यामा संलग्न भएको पाइएपछि राहदानी रद्द गरिएको जनाइएको छ ।

मानवताविरुद्धको अपराध गरेकाले उनीहरूको राहदानी रद्द गरिएको बंगलादेशका अधिकारीले बताएका छन् ।

यता भारत सरकारले भने हसिनाको राहदानी रद्द भएको केही समयपछि नै उनको भिसाको म्याद थप गरेको छ । जसबाट भारतले हसिनालाई बंगलादेश डिपोर्ट नगर्ने स्पष्ट भएको भारतीय सञ्चारमाध्यमले जनाएका छन् ।

यसअघि, जनवरी ६ मा बंगलादेशको अन्तर्राष्ट्रिय फौजदारी न्यायाधीकरणले उनीविरुद्ध पक्राउ पुर्जी जारी गरेको थियो । न्यायाधीकरणले हसिनालाई फेब्रुअरी १२ सम्ममा उपस्थित हुन भनेको छ । बंगलादेशको अन्तरिम सरकारले पनि हसिनालाई देश निकाला गर्न भारतलाई आग्रह गरेको छ ।

बंगलादेशको स्वतन्त्र छानबिन आयोगका प्रमुख मेजर जनरल फजलुर रहमानले भारतले शेख हसिनालाई देश निकाला नगरे आयोग भारतमा आएर सोधपुछ गर्न तयार रहेको बताएका छन् ।

५ अगस्टको घटनापछि हसिना भारतको शरणमा छिन् । बंगलादेशको युनुस सरकारले हसिनाविरुद्ध हत्या, अपहरणदेखि देशद्रोहसम्मका २२५ भन्दा बढी मुद्दा दर्ता गरेको छ ।