नयाँ दिल्ली । पूर्वप्रधानमन्त्री मनमोहन सिंहको शनिबार दिल्लीको कश्मिरी गेटस्थित निगमबोध घाटमा राजकीय सम्मानका साथ अन्त्येष्टि गरिएको छ । उनको अन्त्येष्टि परिवार, साथीभाइ, सहकर्मी र सरकारी विशिष्ट व्यक्तिको उपस्थितिमा भएको थियो ।

राष्ट्रपति द्रौपदी मुर्मू, प्रधानमन्त्री नरेन्द्र मोदी, केन्द्रीय गृहमन्त्री अमित शाह र रक्षामन्त्री राजनाथ सिंहले उनको पार्थिव शरीरमा माल्यार्पण गरी श्रद्धाञ्जली अर्पण गरेका थिए । शिख रीतिरिवाजअनुसार सिंहको अन्त्येष्टि गरिएको हो । 

कांग्रेस अध्यक्ष मल्लिकार्जुन खड्गे, सोनिया गान्धी, राहुल गान्धी पनि आफ्ना पूर्वनेता र पूर्वप्रधानमन्त्रीको अन्तिम संस्कारको कार्यक्रममा सहभागी भएका थिए ।

पूर्वप्रधानमन्त्री सिंहको पार्थिव शरीरलाई शनिबार बिहान उनको निवासबाट श्रद्धाञ्जलीका निम्ति दिल्लीस्थित अल इन्डिया कंग्रेस कमिटी (एआईसीसी)को मुख्यालयमा ल्याइएको थियो । दिल्लीस्थित पूर्वप्रधानमन्त्रीको निवासबाहिर पनि श्रद्धाञ्जली अर्पण गर्न कैयौँ मानिस भेला भएका थिए । 

यसअघि, शुक्रबार मन्त्रिपरिषद्को बैठकपछि गृहमन्त्री अमित शाहले कांग्रेस अध्यक्ष खड्गे र स्व. सिंहको परिवारलाई सरकारले स्मारकका निम्ति ठाउँ छुट्ट्याइने जानकारी गराएका थिए ।

सिंह लामो समय भारतीय राजनीतिमा सक्रिय थिए । विशेष गरी आर्थिक संकटको समयमा स्थिर नेतृत्व र भारतको अर्थव्यवस्थाको आधुनिकीकरणमा योगदानका निम्ति उनलाई सम्झना गरिन्छ । रासस/एएफपी