काठमाडौं । यो वर्षको हिउँदको दोस्रो वर्षा आउँदो सोमबार र मंगलबार हुने सम्भावना छ । सोमबार राति र मंगलबार देशका केही स्थानमा वर्षा र हिमपातको सम्भावना रहेको मौसम पूर्वानुमान महाशाखाले जनाएको छ ।

पश्चिमी वायुको प्रभावले देशको पश्चिम भूभागमा सोमबार दिउँसोदेखि बदली (आकाशमा बादल) हुने महाशाखाका मौसमविद् शान्ति कँडेलले बताइन् । “सोमबार दिउँसोदेखि नै बादल र सोमबार राति र मंगलबार वर्षा र हिमपातको सम्भावना छ,” उनले बाह्रखरीसित भनिन् ।

उनका अनुसार, सुदूरपश्चिम, कर्णाली, गण्डकी र लुम्बिनी प्रदेशमा वर्षाको सम्भावना छ । यी प्रदेशका उच्च पहाडी र हिमाली भूभागमा हिमपातको पनि सम्भावना छ ।

“वर्षा भनेर त्यस्तो ठूलो होइन, हल्का वर्षाको सम्भावना छ,” उनले भनिन्, “हिमपात भने हल्कदेखि मध्यमसम्मको सम्भावना छ ।”

यी चार प्रदेशका पनि सबै ठाउँमा पानी नपर्ने उनले स्पष्ट पारिन् । केही स्थानमा मात्र वर्षाको सम्भावना रहेको उनले बताइन् ।

“त्यहाँ (पश्चिम भूभाग) जमिन भिज्ने पानी पर्ने सम्भावना छ,” उनले भनिन्, “हिलो भयो भन्ने खालको वर्षाचाहिँ हुन्छ ।”

बदली, वर्षा र हिमपातसँगै चिसो बढ्ने भएकाले स्वास्थ्य सतर्कता अपनाउनुपर्नेमा उनले जोड दिइन् । “घाम लाग्दैन, चिसो बढ्छ,” उनले भनिन् ।

उक्त अवधिमा वाग्मती प्रदेशका पनि केही स्थानमा वर्षा र हिमपातको सम्भावना छ । तर, पश्चिम भूभागमा जस्तो यहाँ वर्षाको धेरै सम्भावना नदेखिएको उनले जानकारी दिइन् ।

उनका अनुसार, आउँदो मंगलबार काठमाडौंमा छिटपुट वर्षाको सम्भावना छ । “काठमाडौंमा मंगलबार फाटफुट पानी पर्ने सम्भावना छ,” उनले भनिन्, “यहाँ जमिन भिज्ने गरी पर्दैन । अस्तिको जस्तो (मंसिर २३ र २४ गते हिउँदको पहिलो वर्षा) नै हुने सम्भावना छ ।”

तत्कालको अवस्थाबाट हेर्दा उक्त अवधिमा मधेस र कोसी प्रदेशमा वर्षाको सम्भावना छैन । तर, यो समग्र पूर्वानुमान हरेक दिन अध्यावधिक गर्ने गरिएको उनले बताइन् ।

पश्चिमी वायुका कारण विकसित वर्षा गराउने यो प्रणाली मंगलबारसम्म रहने सम्भावना छ । मंगलबार रातिदेखि त्यसको प्रभाव नरहने र क्रमिक रूपमा मौसम सफा हुने मौसमविद् कँडेलले जानकारी दिइन् ।

त्यसपछि फेरि वर्षा गराउने अर्को प्रणाली भित्रने सम्भावना छ ? भन्ने प्रश्नमा उनले भनिन्, “प्रणाली आउने जाने भइरहनेजस्तो सम्भावना छ । यसबारे हरेक दिन जानकारी लिइराख्दा राम्रो हुन्छ ।”

अरू केही मौसमविद्ले पनि सोमबार राति र मंगलबार वर्षाको सम्भावना औँल्याएका छन् ।

गएको मंसिर २३ र २४ गते देशका केही स्थानमा यो वर्षको हिउँदको पहिलो वर्षा भएको थियो । त्यति बेला काठमाडौंमा छिटपुटसहित पश्चिम नेपालमा हल्कादेखि मध्यमसम्म वर्षा भएको थियो ।