काठमाडौं । कर्णाली याक्सका क्रिकेटर गुल्सन झाले ट्वान्टी–२० मा नतिजा के हुन्छ भन्ने आकलन गर्न नसकिने नभएकाले अन्तिम बलसम्म आफ्नो टोलीले संघर्ष गरेको बताए । त्यसैले पनि लुम्बिनी लायन्सविरुद्ध अन्तिम बलसम्म एकअर्कालाई प्रोत्साहित गर्दै जित निकाल्न सक्छौँ भन्ने विश्वास रहेको बताए ।

टी ट्वान्टी खेल जहिल्यै पनि प्रतिस्पर्धात्मक हुने कहिले कहीँ मात्र एकपक्षीय खेल हुने भएकाले पनि आफ्ना सहकर्मीले मेहनत गरेको सुनाए । उनले स्पिनरलाई मात्र मद्दत मिल्ने पिच भएकाले आफूले बलिङ नगरेको उल्लेख गरे । सुरुका खेलमा हार व्यहोरे पनि टोलीले सधैँ उच्च आत्मबलका साथ खेलेको गुल्सनको भनाइ छ ।

प्रशिक्षक ज्ञानेन्द्र मल्ल र कप्तान सोमपाल कामीले खेलमा हार भए पनि खेलाडीलाई सम्हादा जित सम्भव भएको उनी बताउँछन् । उनले ब्याटिङ गर्न कसैका लागि पनि सहज नभएको उल्लेख गरे । गुल्सनले आफ्नो उत्कृष्ट प्रदर्शनको पर्खाइ रहेको पनि बताए । शिखर धवनले ब्याटिङमा सुस्त सुरुआत भए पनि धैर्यतापूर्वक खेल्नुपर्ने सुझाव दिएको गुल्सनको भनाइ छ । धवनले आफ्नो खेल करिअरको सुरुआती क्षणका बारे पनि आफूहरूलाई बताएको गुल्सनले उल्लेख गरेका छन् ।