काठमाडौं । काठमाडौं महानगरपालिकाले ३०औँ महानगर दिवस नागरिकसँगै मनाउने जनाएको छ । बुधबार काठमाडौंमा पत्रकार सम्मेलन गर्दै महानगरले दिवसलाई नागरिकको सहभागिता र नागरिकसँगै केन्द्रित गर्ने गरी कार्यक्रम तय गरेको जनाएको हो । 

जसअन्तर्गत सांस्कृतिक तथा सांगीतिक कार्यक्रमलाई यस वर्ष पनि निरन्तरता दिइने महानगरले जानकारी दिएको छ । दिवसको औपचारिक कार्यक्रम मंसिर २९ गते सैनिक मञ्चमा हुनेछ ।  

सांस्कृतिक तथा सांगीतिक कार्यक्रम अपराह्न ३ बजेदेखि टुँडिखेल मैदानमा हुने काठमाडौं महानगरपालिकाका प्रवक्ता नवीन मानन्धरले जानकारी दिए । सांगीतिक कार्यक्रममा स्थानीय मौलिक परम्परागत परिकारको प्रवद्र्धन गर्नेगरी खाना मेला समेत हुने उनले बताए । 

त्यस्तै, एक वडा एक नमुना उद्यम कार्यक्रमबाट उत्पादित सामग्री तथा वस्तुको प्रदर्शनी गर्ने प्रवक्ता मानन्धरले बताए । 

यस वर्ष महानगरपालिकाका प्रमुख बालेन्द्र शाह (बालेन)को अध्यक्षतामा मूल समारोह समिति गठन गरिएको महानगरले जनाएको छ । १९९६ पुस ३ गते स्थापना गरिएको सफाइ अड्डाको संस्थागत जग महानगरको इतिहास हो । 

०५२ साल मंसिर २९ गते काठमाडौं नगरलाई काठमाडौं महानगर घोषणा गरिएको थियो । यसै दिनलाई महानगर दिवसका रूपमा मनाउने गरिएको छ ।