काठमाडौं । पहिलो भारत–नेपाल पर्यटन सम्मेलन सम्पन्न भएको छ । नेपाल पर्यटन बोर्डसँगको सहकार्यमा काठमाडौंस्थित भारतीय दूतावासले आयोजना गरेको सम्मेलन मंगलबार काठमाडौंमा सम्पन्न भएको हो । 

सम्मेलन भारत र नेपालबीच 'सर्किट टुरिजम' कार्यान्वयनलाई प्रोत्साहन र उत्तर प्रदेशको प्रयागराजमा 'महाकुम्भ २०२५'को प्रवर्द्धनमा केन्द्रित थियो । 

सम्मेलनमा संस्कृति, पर्यटन तथा नागरिक उड्डयन राज्यमन्त्री अरूणकुमार चौधरी, कार्यवाहक भारतीय राजदूत प्रसन्न श्रीवास्तव र नेपाल पर्यटन बोर्डका प्रमुख कार्यकारी अधिकृत दीपकराज जोशीले उद्घाटन गरेका थिए । 

सम्मेलनमा राज्यमन्त्री चौधरीले नेपालको पर्यटनमा स्थलमार्गबाट हुने अन्तरदेशीय पर्यटनको ठूलो योगदान रहेको बताए । 

कार्यवाहक राजदूत श्रीवास्तवले नेपालका र भारतका छिमेकी राज्यमा रहेका धार्मिक तथा सांस्कृतिक सर्किटहरूको प्रवर्द्धनमार्फत भारत–नेपाल पर्यटन क्षमताको पूर्ण सदुपयोग गर्न दुवै पक्षले निरन्तर संयुक्त प्रयास गर्नुपर्ने बताए ।

पर्यटन बोर्डका प्रमुख कार्यकारी अधिकृत जोशीले नेपाल भ्रमण गर्ने विदेशी पर्यटकको सबैभन्दा ठूलो स्रोत भारत रहेको बताए ।

सम्मेलनमा भारतका १३ प्रतिनिधि र नेपालका ६० जना टुर अपरेटर सहभागी थिए । 

सम्मेलनमा स्थलमार्ग हुँदै अन्तरदेशीय पर्यटन प्रवर्द्धन गर्ने विषयमा छलफल भएको दूतावासले जनाएको छ । रामायण र बुद्ध सर्किटको सन्दर्भमा दुवैतिरका टुर अपरेटरले दुवै देशका पर्यटकका लागि सम्भावित यात्रा योजनाबारे विचार चर्चा गरेका थिए ।