काठमाडौं । गुगलले एक नयाँ अत्याधुनिक चिप सार्वजनिक गरेको छ । यो चिपलाई क्वान्टम कम्प्युटिङका क्षेत्रमा महत्त्वपूर्ण सफलता मानिएको छ ।

गुगलले यसलाई ‘माइन्डबोगलिङ’ क्वान्टम कम्प्युटिङ चिप भनेको छ । यसले हाल विश्वमा उपलब्ध सबैभन्दा तीव्र सुपर कम्प्युटरले १० सेप्टिलियन वर्ष लगाउने काम पाँच मिनेटमै गर्न सक्ने भनिएको छ । १० सेप्टिलियन वर्ष भनेको एकको पछाडि २५ वटा शून्य थप्दा हुन आउने वर्ष हो ।

गुगलले अनेकौँ ‘ब्रेकथ्रु’सहितको यो नयाँ क्वान्टम चिपलाई ‘विलो’ नामकरण गरेको छ । यसबाट ‘पार्टिकल फिजिक्स’को सिद्धान्तका आधारमा शक्तिशाली कम्प्युटर बनाउन सकिने भएको हो ।

विलो हालका निम्ति ठूलो मात्रामा ‘प्रयोगात्मक यन्त्र’ भएको विज्ञको भनाइ छ । अर्थात्, यो चिपबाट क्वान्टम कम्प्युटर बनाउन अझै वर्षौँको समय र अर्बौँ अमेरिकी डलर खर्च हुने बताइएको छ ।

क्वान्टम कम्प्युटरले हालको हाम्रो फोन वा ल्यापटपले भन्दा फरक तरिकाले काम गर्छ । निकै साना कणको व्यवहार अर्थात् क्वान्टम मेकानिक्सको प्रयोग गरेर यस्तो सुपर कम्प्युटरले पुराना कम्प्युटरभन्दा फरक तरिकाले काम गर्छ ।

क्वान्टम कम्प्युटरले ठूला र निकै जटिल प्रक्रियालाई सजिलै समाधान गर्ने हुँदा नयाँ औषधि पत्ता लगाउन सहयोगी हुने अपेक्षा गरिएको छ । यसले ‘इन्क्रिप्सन’ गरिएका डाटालाई तोड्न सक्ने हुँदा गोपनीयताको चिन्ता पनि छ । बीबीसीबाट ।