काठमाडौं । नयाँ ब्रान्ड ‘सूर्य फ्युजन’लाई बजारीकरण गर्न सूर्य नेपालले गैरकानुनी हतकन्डा अपनाएपछि आन्तरिक राजस्व विभागले अनुसन्धानलाई तिब्रता दिएको छ । बाह्रखरीमा प्रकाशित समाचारपछि विभागले काठमाडौं उपत्यकाका कार्यालयमार्फत डिलरहरूमा छापा मारेर ल्यापटप तथा कागजपत्र नियन्त्रणमा लिएको हो ।

कम्पनीले आफ्नो नयाँ ब्रान्ड ‘सूर्य फ्युजन’को प्रचार गर्न अन्तःशुल्क स्टिकर नटाँसी बजारमा पठाएको विषयमा समाचार प्रकाशित भएको थियो ।

‘फ्री फ्लो’ नाम भएको रंगिन बट्टामा कम्पनीले उपहार स्वरूप पाँच खिल्ली चुरोट पसल–पसलमा वितरण गर्दै आएको छ । कानुनविपरीतको काम भन्दै विभागले यस विषयमा अनुसन्धान जारी राखेको छ ।

“विभागले राजस्व कार्यालयहरूमार्फत् उपत्यकाभरीका डिलरमा छापा मारेको छ,” विभाग उच्च स्रोतले भन्यो, “प्रारम्भिक रूपमा कम्पनीले ऐन विपरीतका कार्य गरेको हामीले केही आधारहरू प्राप्त गरेका छौं । त्यसकै आधारमा हामी अनुसन्धान गरिरहेका छौं ।”

कम्पनीले बजारमा वितरण गरेको पाँच खिल्लीको ‘फ्री फ्लो’ नाम भएको रंगिन बट्टामा न त सुर्तीजन्य पदार्थ ऐन, २०६८ अनुसार कुनै सन्देश छ, न यसमा अन्तःशुल्क स्टिकर नै छ ।

विभागले नै एक्सन लिएर अहिले यो विषयमा अनुसन्धान गरिरहेको छ । आन्तरिक राजस्व कार्यालय पुतलीसडकले अनामनगरको डिलरबाट ल्यापटप तथा कागजपत्र नियन्त्रणमा लिएको जनाएको छ । तर, अनुसन्धानलाई नै प्रभावित पार्नेगरी सूर्य नेपालका उपाध्यक्ष रवि केसी विभागमा धाउन थालेका छन् । उनले विभागका कर्मचारीलाई पनि भेटघाट गरेको स्रोतले जानकारी दियो ।

उनले सुरुमा विभागलाई आफ्नो कम्पनीले यस्तो काम नगरेको बताएका थिए ।  तर, पछिल्ला दिनमा केसीले गैरजिम्मेवार तरिकाले अन्य होटल तथा रेस्टुरेन्टमा पनि यस्ता क्रियाकलाप भइरहेको विभागका अधिकारीसँगको कुराकानीमा बताएको ती उच्च अधिकारीले बताए । 

तर, उनले ‘सूर्य फ्युजन’ चुरोटको मार्केटिङका लागि गैरकानुनी हतकन्डा प्रयोग गरेको हुन सक्ने विभागका कर्मचारीहरूकै अनुमान छ । किराना पसलेहरूका अनुसार ‘सूर्य फ्युजन’ चुरोटको मार्केटिङ गर्न कम्पनीबाट नै सेल्स एजेन्टहरू पुग्ने गरेका छन् ।

उनीहरूले पोस्टर टाँस्ने र तीनदेखि पाँच बट्टा ‘सूर्य फ्युजन’ चुरोट राख्नेलाई पाँच खिल्लीको आकर्षक बट्टा दिँदै आएका छन् । जुन गैरकानुनी काम भएको विभाग बताउँछ ।

सरकारले चुरोटबाट अन्तःशुल्क, स्वास्थ्य कर, मूल्य अभिवृद्धि कर (भ्याट) र आयकर गरी विभिन्न शीर्षकमा राजस्व संकलन गर्छ । 

सूर्य नेपालले उपहार स्वरूप चुरोटका खिल्ली वितरण गरेर चारवटै शीर्षकमा सरकारले पाउने कर छल्न खोजेको प्रष्ट छ । किनभने यो कम्पनीले गैरकानुनी रूपमा बजारमा चुरोट बिक्री वितरण गरेको छ । चुरोट तथा सुर्तीजन्य उत्पादन गर्ने उद्योगले अन्तःशुल्क स्टिकरबापत प्रतिस्टिकर २५ पैसा, स्वास्थ्य जोखिम करबापत प्रतिखिल्ली ६० पैसा, आयकरबापत ३० प्रतिशत र भ्याटबापत १३ प्रतिशत राज्यलाई तिर्नुपर्छ ।