काठमाडौं । नेपाल प्रिमियर लिग (एनपीएल)को आफ्नो पाँचौँ खेलमा लुम्बिनी लायन्सले चितवन राइनोजविरुद्ध पहिले ब्याटिङ गर्दै छ । मंगलबार कीर्तिपुरस्थित त्रिवि क्रिकेट मैदानमा टस जितेर चितवनले फिल्डिङको निर्णय गर्दै लुम्बिनीलाई ब्याटिङमा निम्त्याएको हो ।

जारी खेलको एक ओभर सकिँदा लुम्बिनीले विकेट नगुमाई एक रन बनाएको छ । लुम्बिनी प्रतियोगितामा जितविहीन एक मात्र टोली हो । लुम्बिनीले यसअघिका चारमध्ये चारै खेलमा हारको सामना गरेको थियो ।

प्रतियोगिताको आफ्नो पहिलो खेलमा लुम्बिनीले विराटनगर किंग्सविरुद्ध दुई विकेटको हार व्यहोरेको थियो । दोस्रो खेलमा पोखरा एभेन्जर्ससँग १० विकेटको फराकिलो हार व्यहोरेको लुम्बिनीले तेस्रो खेलमा सुदूरपश्चिम रोयल्सविरुद्ध ४५ रनको र चौथो खेलमा जनकपुर बोल्ट्सविरुद्ध एक रनको हार व्यहोरेको थियो ।

यसैकारण प्रतियोगिताका प्लेअफमा पुग्ने गणितीय सम्भावना कायम राख्न आज लुम्बिनी जितको दबाबमा छ । आजको खेलमा पराजित भए लुम्बिनी आधिकारिक रूपमै प्रतियोगिताबाट बाहिरिने पहिलो टोली बन्नेछ ।

यता, प्रतियोगिताका चारमध्ये तीन खेलमा जित निकालेको चितवन आज जितसहित प्लेअफ सम्भावनालाई बलियो बनाउने लक्ष्यमा छ ।

चितवनले यसअघि प्रतियोगिताको आफ्नो पहिलो खेलमा काठमाडौं गुर्खाजविरुद्ध पाँच विकेटको जित निकालेको थियो । दोस्रो खेलमा पोखरा एभेन्जर्सविरुद्ध ८७ रनको जित निकालेको चितवन तेस्रो खेलमा भने कर्णाली याक्सविरुद्ध ६ विकेटले पराजित भएको थियो । चौथो खेलमा चितवनले प्रतियोगिताको उपाधि दाबेदारका रूपमा हेरिएको सुदूरपश्चिम रोयल्सलाई ३३ रनले पराजित गरेको थियो ।