दमौली (तनहुँ) । नेकपा (माओवादी केन्द्र) का उपमहासचिव एवं पूर्वअर्थमन्त्री वर्षमान पुनले सरकारले सुशासनका पक्षमा काम गर्नुपर्ने बताएका छन् । प्रेस सेन्टर नेपाल तनहुँ शाखाले आज दमौलीमा आयोजना गरेको पत्रकार सम्मेलनमा उनले आर्थिक समृद्धि हासिल गर्न सुशासन महत्त्वपूर्ण भएको गरे ।

उनले आर्थिक समृद्धिको लक्ष्य लिँदै सुशासन र जनताको पक्षमा काम गर्नुपर्ने अहिलेको आवश्यकता रहेको बताए । उनले सरकारले यसका लागि गर्ने हरेक कार्यमा आफ्नो पार्टीको साथ रहने बताए ।

“सरकारले राम्रो काम गरोस् भन्ने हाम्रो चाहना हो । सरकारले जनताका पक्षमा र सुशासनका पक्षमा काम गर्नुपर्छ । यस्तो कार्यमा हाम्रो साथ र समर्थन रहनेछ । माओवादी पार्टी अहिले सरकार फेरबदलमा लाग्दैन,” उपमहासचिव पुनले भने ।

उनले लोकतन्त्रको विकल्प लोकतन्त्रमात्रै भएका तर वर्तमान शासन व्यवस्थाबारे कुरा उठ्न थालेकाले यसको सुधार आवश्यक रहेकामा जोड थियो ।

उपमहासचिव पुनले भने, “व्यवस्था त बदलियो । तर, अवस्था बदलिएन । हामी २०८४ को चुनावमा यही ‘एजेन्डा’ लिएर जनतामाझ जानेछौँ । जनताले खोजेको पनि यही हो । अहिले हामी संघठन सुधारको अभियानमा लागिरहेका छौँ ।” रासस