काठमाडौं । दक्षिण तथा मध्य एसिया हेर्ने अमेरिकी सहायक विदेशमन्त्री डोनाल्ड लु नेपाल भ्रमणको सिलसिलामा आइतबार काठमाडौं आइपुगेका छन् । उनी भारत, श्रीलंका हुँदै नेपाल आएका हुन् ।

“आफ्नो दक्षिण एसिया भ्रमणको क्रममा उहाँले काठमाडौंमा नेपाल सरकारका नेतृत्वकर्ताहरूसँग शिष्टाचार भेट र नागरिक समाजसँग कुराकानी गर्नुहुनेछ,” काठमाडौंस्थित अमेरिकी दूतावासले भनेको छ ।

यो भ्रमणले अमेरिका–नेपाल सम्बन्धलाई मजबुत बनाउने दाबी दूतावासले गरेको छ । 

भ्रमणले वातावरणीय सुरक्षा, महिला सशक्तिकरण, सांस्कृतिक संरक्षण, र दिगो विकासजस्ता मुख्य क्षेत्रहरूमा दुई देशबीचको सहकार्यलाई अघि बढाउने पनि दूतावासले जनाएको छ ।