वेलिंगटन । न्युजिल्यान्डको सबैभन्दा अग्लो हिमाल माउन्ट कुक आरोहणका क्रममा बेपत्ता भएका तीन आरोहीको ‘मृत्यु’ भएको प्रहरीले शुक्रबार जनाएको छ ।

‘मृत्यु’ हुनेमा ५६ वर्षीय अमेरिकी कर्ट ब्लेयर र ५० वर्षीय कार्लोस रोमेरोसहित एक क्यानेडियन आरोही (परिवारको इच्छाअनुसार नाम गोप्य राखिएको) रहेका बताइएको छ ।

दक्षिण टापुको तीन हजार ७०० मिटर अग्लो माउन्ट कुकको आरोहणबाट फर्कन नसकेपछि तीनैजना पाँच दिनअघि बेपत्ता भएका थिए । स्थानीय प्रहरी निरीक्षक विकी वाकरले भने, “शुक्रबार उनीहरू हराएको पाँचौँ दिन पुगेको छ । उनीहरू बाँचेको हुन सक्ने कुनै आधार छैन ।”

खतरनाक मौसमका कारण तीन दिनसम्म खोजीकार्य रोकिएको थियो । तर, शुक्रबारको अवस्थाले अल्पाइन इलाकामा खोजीका निम्ति हेलिकोप्टर र ड्रोन तैनाथ गर्न सहज भएको छ ।

खोजी टोलीले यसअघि उनीहरूको भनिएको एकथान ज्याकेट, हिउँमा बाटो बनाउन प्रयोग गरिने हतियार (हाते बन्चरो)लगायत सामग्री भेटिएको जनाएको छ ।

शुक्रबारको ड्रोन फुटेजमा पनि पदचिह्न पछ्याइएको र उनीहरू तीनैजनाले जुरब्रिगेन पहाडको चुचुरो काटेको संकेत देखिन्छ ।

वाकरले भने, “पर्वतारोहीहरू कति दिनदेखि हराइरहेका छन्, उनीहरूसँग कुनै सञ्चार छैन । हामीले प्राप्त गरेका सामानहरू र आज हाम्रो टोलीको समीक्षापछि ती व्यक्तिहरू बाँचेका हुन सक्ने कुनै आधार भेटिएन ।”

वाकरले तीनै आरोहीका परिवारसँग सम्पर्क गरिएको बताउँदै नयाँ सूचना वा विश्वसनीय दृश्य देखिएमा प्रहरीले पुनः खोजीकार्य थाल्ने बताए । रासस/एएफपी