काठमाडौं । हुन्डाई मोटर ग्रुपले इन्डियन इन्स्टिच्युट अफ टेक्नोलोजी (आईआईटी)सँग ब्याट्री र विद्युतीकरणमा संयुक्त अनुसन्धान गर्न सम्झौता गरेको छ । हुन्डाईले आईआईटी दिल्ली, आईआईटी मुम्बई र आईआईटी मद्राससँग सम्झौता गरेको मंगलबार घोषणा गरेको हो ।

हुन्डाई मोटर ग्रुपको प्रायोजनमा आईआईटी दिल्लीमा हुन्डाई सेन्टर अफ एक्सिलेन्स (सीओई)को स्थापना हुने भएको छ । सीओईको प्राथमिक लक्ष्य भारतीय बजारका निम्ति ब्याट्री र इलेक्ट्रिफिकेसन (विद्युतीकरण)मा आधुनिकता ल्याउनु रहेको कम्पनीले जनाएको छ ।

हुन्डाई मोटर ग्रुपका अधिकारीहरू, आईआईटी दिल्लीका निर्देशक प्रोफेसर रंगन बेनर्जी, आईआईटी मुम्बईका डीन सचिन सी. पटवर्धन र आईआईटी मद्रासका डीन मनु सन्थानमलगायत आईआईटी प्रतिनिधिको सहभागितामा आईआईटी दिल्लीमा आयोजित कार्यक्रममा उक्त सम्झौतापत्रमा हस्ताक्षर भएको थियो । यसको नाम हुन्डाई मोटर ग्रुप–आईआईटी हुन्डाई सीओई राखिएको छ ।