काठमाडौं । नेपाली कांग्रेसका महामन्त्री विश्वप्रकाश शर्माले स्थानीय तह उपनिर्वाचनको नतिजालाई सकारात्मक रूपमा लिइएको बताएका छन् । उनले उपनिर्वाचन परिणामलाई पार्टीले उत्साहका रूपमा लिएको बताएका हुन् ।

उपनिर्वाचन हुँदा पनि मतदाताको उत्साहजनक सहभागिता, राजनीतिक दलहरूले पाएको मत, प्रणालीप्रति जनताको विश्वास र यही प्रणालीबाट समुन्नतिको बाटोमा हिँड्नुपर्छ भनेर राजनीतिक दलहरूलाई घचघच्याएको रूपमा यसलाई आफूहरूले बुझेको उनले उल्लेख गरे ।

पार्टीले उपनिर्वाचनको प्रारम्भिक समीक्षा सार्वजनिक गरिसकेको उनले सुनाए । उनले उपनिर्वाचन भएका प्रत्येक वडा र पालिकामा अगाडिको निर्वाचन र पछिल्लोको अंकगणित के रह्यो भन्ने विषयमा पार्टी गम्भीर समीक्षामा लागेको बताए ।

उपनिर्वाचन भएका ४४ मध्ये १९ स्थानको नतिजा आफ्नो पक्षमा आएको उनले उल्लेख गरे । उनले एक्लै लडेर प्राप्त गरेको गुणात्मक मत अझै महत्त्वपूर्ण भएको बताए ।

महामन्त्री शर्माले पार्टीको महासमिति बैठकबाट एक्लै निर्वाचन लड्ने प्रस्ताव पारित गरिएको भए पनि केही ठाउँमा आत्मीयताका आधारमा मिलेर जानु स्वाभाविक भएको धारणा व्यक्त गरे ।

विश्वप्रकाश शर्माको भनाइ पढ्नोस्–
स्थानीय तहको उपनिर्वाचनको परिणाम स्वाभाविक रूपमा आगामी दिनहरूको लागि समीक्षा र विश्लेषण गर्ने रूपले महत्त्वपूर्ण छ । नेपाली कांग्रेसले हरेक चुनावलाई महत्त्वका साथ लिन्छ । कुनै पनि चुनावमा आफ्नो पार्टीको तर्फबाट लाग्ने एफोर्ट दिन्छ । कुनै पनि चुनावलाई खेलाँचीको रूपमा लिँदैन । पार्टीले उपनिर्वाचको तयारीका लागि मलाई जिम्मेवारी दिएपछि हामी तिहारपछि तयारीमा लागेका थियौँ । पार्टीका सबै साथीहरू सम्भव भएसम्म सबै जुट्नुभयो । अहिले परिणाम आइसकेपछि हामी प्रारम्भिक समीक्षा धारणा पनि प्रस्तुत गरिरहेका छौँ । प्रत्येक वडा र पालिकामा गम्भीर रूपमा अगाडिको निर्वाचन र पछिल्लो निर्वाचनको अंकगणित के रह्यो ? उपलब्धि हुँदै गर्दा कसरी भयो ? गुम्दै गर्दा कसरी गुम्यो ? भन्ने कुरा हामो सचिवालयले तथ्यांकसहित सबै तयारी गरिरहेकै छ । अहिले प्रारम्भिक रूपमा भनिरहँदा लोकतान्त्रिक प्रक्रियामा उपनिर्वाचन हुँदा पनि यो प्रक्रियामा मतदाताको उत्साहजनक सहभागिता र मुख्य राजनीतिक दलहरूले पाएको मत, प्रणालीप्रतिको विश्वास, यही प्रणालीबाट समुन्नतिको बाटोमा हिँड्नुपर्छ भनेर राजनीतिक दलहरूलाई घच्घच्याएको जनादेशलाई पुनर्ताजगी गरेको रूपमा हामीले बुझेका छौँ । नेपाली कांग्रेस पार्टीले अहिलेको चुनावमा कहाँ कमजोरी भयो ? त्यसको पनि समीक्षा गर्दै छ । के उपलब्धि भयो ? त्यसलाई पनि विश्लेषण गर्दै छ । उपनिर्वाचन परिणामलाई हामीले उत्साहका रूपमा लिएका छौँ । सकारात्मक रुपमा लिएका छौँ । यदि गणितीय हिसाबमा जाने हो भने नेपाली कांग्रेस ४४ स्थानमध्ये २७ वटा स्थानमा निर्वाचित भएको थियो । अहिले १९ ठाउँमा विजयी भयो । गणितीय व्याख्या गर्दा कम विजयी भएको देखिन्छ । ४४ स्थानमा १९ स्थान भनेको ४३ प्रतिशत जितेको अवस्था हो । त्यसका बाबजुद पनि नेपाली कांग्रेसले तत्कालीन चुनावको परिस्थिति, मनोविज्ञान, त्यस बेलाका समीकरण र अहिलेको परिस्थिति, मनस्थिति र समीकरणलाई हेर्ने हो भने गुणात्मक रूपले यो महत्त्वपूर्ण छ । गत निर्वाचनमा हामी कहीँ माओवादीसँग गठबन्धन गरेर लडेका थियौँ, कहीँ नेकपा (एकीकृत समाजवादी)सँग हाम्रो समीकरण थियो । गठबन्धन गरेर प्राप्त गरेको २७ वटा सिटभन्दा गठबन्धन नगरीकन प्राप्त भएको १९ सिट विशेष रूपले महत्त्वपूर्ण छ । न्युज एजेन्सी नेपाल