विराटनगर । नेपाली कांग्रेसका नेता डा. शेखर कोइराला पक्षको पालिका सभापतिहरूको भेला सुरु भएको छ । मंगलबार विराटनगरको जैन भवनमा आयोजित भेलामा कोइरालासहित डा. मीनेन्द्र रिजाल, गुरु घिमिरे, राजीव कोइरालालगायत नेता सहभागी छन् ।

भेलामा पार्टीका पालिका सभापतिहरूसहित कांग्रेस कार्यकर्ताको बाक्लो उपस्थिति छ । आजै यसअघि पालिका सभापतिहरूले मोरङको बेलबारीमा पदयात्रा गरेका थिए । इलाम, ताप्लेजुङ, भोजपुरलगायत जिल्लाका पार्टी सभापतिहरूले बेलबारीको बेतनादेखि लोहन्द्रा खोला पुलसम्म पदयात्रा गरेका थिए । बेलबारी हुंदै उनीहरू विराटनगर आएका हुन् ।

आयोजक नेपाली कांग्रेस विराटनगर महानगर समितिका सभापति दीपक चापागाईंले कार्यक्रममा पालिका सभापति र कांग्रेस कार्यकर्ताको उल्लेखनीय सहभागिता रहेको बताए ।

यही मंसिर २२ गते कांग्रेस कोसी प्रदेश समितिको भेला विराटनगरमै आयोजना गरिँदै छ । उक्त कार्यक्रममा कांग्रेस सभापति शेरबहादुर देउवा प्रमुख अतिथि हुनेछन् ।

कांग्रेस केन्द्रीय कार्यालयले भने जिल्ला समितिका नाममा पत्र पठाएर मंगलबारको कार्यक्रम पार्टीको आधिकारिक नभएकाले सहभागी नहुन भनेको थियो ।