काठमाडौं । पाकिस्तानका पूर्वबलर सोहेल तान्विरले घातक बलिङ गरेपछि नेपाल प्रिमियर लिग (एनपीएल)अन्तर्गत सोमबारको पहिलो खेलमा चितवन राइनोजविरुद्ध काठमाडौं गुर्खाज १११ रनमै रोकिएको छ ।

कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको काठमाडौंले निर्धारित २० ओभर ब्याटिङ गरे पनि नौ विकेट गुमाएर १११ रनको सामान्य योगफल खडा गर्‍यो । योसँगै चितवनले जितका निम्ति ११२ रनको लक्ष्य पाएको छ ।

चितवनविरुद्ध निरीह देखिएको काठमाडौंका चार ब्याटरले मात्रै दोहोरो अंकमा रन जोडे । काठमाडौंका सुमित महर्जनले सर्वाधिक २९ रन बनाए । माइकल लेभिटले २५ रन थप्दा डान डोउथह्वाइटले १९ र शंकर रानाले १६ रन जोडे । 

काठमाडौंको ब्याटिङ धरासायी बनाउन चितवनबाट खेलिरहेका पूर्वपाकिस्तानी बलर तान्विरले पाँच विकेट लिए । काठमाडौंको शीर्ष क्रमका ब्याटरविरुद्ध प्रभावकारी देखिएका तान्विरले स्टेफन एस्किनाजी, गेरहार्ड इरास्मस, भीम सार्की, करण केसी र साहब आलमको विकेट लिए । चार ओभरको स्पेलमा तान्विरले २१ रनमात्र खर्चिए । यसबाहेक, चितजनका कप्तान कुशल मल्ल, रिजन ढकाल, अमर रौटेला र लुक बेन्किन्स्टेनले समान एक विकेट लिए । 

काठमाडौंले दोस्रो ओभरको पहिलो बलमै विकेट गुमाएको हो । काठमाडौंका स्टेफन एस्किनाजीलाई चितवनका सोहेल तान्विरले अमर रौटेलाबाट क्याच गराए । चौथो ओभरको चौथो बलमा काठमाडौंले दोस्रो विकेट गुमायो । काठमाडौंका माइकल लेभिटलाई तान्विरले नै दीपक बोहराबाट क्याच गराए । 

यस्तै, काठमाडौंले पाँचौँ ओभरको चौथो बलमा तेस्रो विकेट गुमायो । चितवनका कप्तान कुशल मल्लले काठमाडौंका गेरहार्ड इरास्मसलाई बोल्ड गरे । चितवनका तान्विरले छैटौँ ओभरको दोस्रो बलमा टिमलाई चौथो सफलता दिलाए । उनले काठमाडौंका भीम सार्कीलाई एलबीडब्लूको धरापमा पारे । काठमाडौंले पाँचौँ विकेट ११औँ ओभरमा गुमायो । १०.३ ओभरमा चितवनका अमर रौटेलाले शंकर रानालाई विकेट किपर विपीन रावलबाट क्याच गराए । 

चितवनले छैटौँ विकेट १४औँ ओभरको पहिलो बलमा लियो । काठमाडौंका राशिद खानलाई चितवनका लुक बेन्केन्स्टाइनले शरद भेषवाकरबाट क्याच गराउँदै पभेलियनको दिशा देखाए । सातौँ विकेट काठमाडौंले १८औँ ओभरको पाँचौँ बलमा गुमायो । चितवनका रिजन ढकालले सुमित महर्जनलाई हसन आइसखिलबाट क्याच गराए । 

यस्तै, आठौँ र नवौँ विकेट काठमाडौंले १९औँ ओभरमा गुमायो । १९औँ ओभरको पहिलो बलमा तान्विरले काठमाडौंका कप्तान करण केसीलाई सन्तोष कार्कीबाट क्याच गराए । सोही ओभरको पाँचाँै बलमा तान्विरले साहब आलमलाई कुशल मल्लबाट क्याच गराए । प्रतियोगितामा दुवै टिमको यो पहिलो खेल हो । आजै हुने दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुने तालिका छ ।