काठमाडौं । भौतिक पूर्वाधार तथा यातायातमन्त्री देवेन्द्र दाहालले चालु आर्थिक वर्षको बजेटमा पास नभएका ११ हजार 'नक्कली आयोजना' अध्ययन गरेर खारेज गर्ने बताएका छन् । आइतबार मन्त्रालयमा पूर्वाधार पत्रकारसँग भएको छलफल कार्यक्रममा मन्त्री दाहालले नक्कली आयोजना खडा गरेर अनावश्यकरूपमा बजेटमा राख्ने प्रवृत्तिको सरकारले अन्त्य गर्ने बताए ।

उनले ११ हजार नक्कली आयोजनाको सन्दर्भमा प्रधानमन्त्रीले बारम्बार प्रश्न उठाएकाले मन्त्रालयले अध्ययन गरेर हटाउने बताए । उनले संसद्ले पास गरेको आयोजनाभन्दा कसरी बढ्यो भन्ने कुराको अध्ययन हुने पनि बताए । उनले भौतिक पूर्वाधार क्षेत्रमा धेरै समस्याहरू रहेको बताए ।

"एघार हजार नक्कली आयोजनाको सन्दर्भमा प्रधानमन्त्रीले उठाएको विषय हो, यी आयोजना कसरी बीचैमा त्यसरी आए । संसद्ले पास गरेको आयोजनाभन्दा कसरी बढ्यो भन्ने कुराको अध्ययन हुनुपर्छ यो अराजकता हो । नक्कली आयोजना खडा गरी अनावश्यक बजेट राख्ने प्रवृत्तिको बारेमा अध्ययन गरी ती आयोजनालाई डिलेट गर्नेबाहेक अरू उपाय छैन," उनले भने ।

उनले पछिल्लो समय पेचिलो बनेको निर्माण व्यवसायीको भुक्तानी आगामी १५ दिनभित्रै गत आर्थिक वर्षमा पाउने रकम भुक्तानी गर्ने पनि बताए ।