काठमाडौं । नेपाल प्रिमियर लिग (एनपीएल) आजदेखि सुरु हुँदै छ । लिगमा आठ टिमले प्रतिस्पर्धा गर्दै छन् । सात प्रदेशका र काठमाडौंको एकसहित आठ टिम सहभागी हुन लागेका हुन् ।

विराटनगर किंग्स, जनकपुर बोल्ट्स, काठमाडौं गुर्खाज, चितवन राइनोज, पोखरा एभेन्जर्स, कर्णाली याक्स, लुम्बिनी लायन्स र सुदूरपश्चिम रोयल्स लिगमा सहभागी छन् । 

लिगको घोषणा भएदेखि नै खेलप्रेमीको ठूलो चासो छ । खेलप्रेमी र शुभेच्छुकको चासो बढ्दै जाँदा लिगमा सहभागी टिमले आमसर्वसाधारणको ध्यान आफूतर्फ खिच्न कलाकार अनुबन्ध गरेका छन् । स्टारडम भएका कलाकारलाई टिमले आफूसँग जोडेका छन् ।

कतिपय कलाकारलाई ब्रान्ड एम्बास्डर र केहीलाई फेस अफ किङ तथा भ्वाइस अफ टिमका रूपमा टिमले कलाकारलाई अनुबन्ध गरेका छन् । 

कर्णाली याक्सले स्वस्तिमा खड्कालाई ब्रान्ड एम्बास्डरमा अनुबन्ध गरेको छ । स्वस्तिमा हाल नेपाली चलचित्र उद्योगमा पहिलाे रोजाइकी नायिका हुन् । ‘बुलबुल’बाट आफूलाई अब्बल नायिकामा दर्ज गरेकी उनले ‘चिसो मान्छे’बाट थप उचाइ लिएकी थिइन् ।

‘बुलबुल’बाट उनले राष्ट्रिय अवार्ड प्राप्त गरेकी थिइन् । उनले केही दिनअगाडि मात्र दोस्रोपटक राष्ट्रिय अवार्ड उचालेकी छन् । ‘दिमाग खराब’बाट उनले उत्कृष्ट अभिनेत्रीको अवार्ड हात पारेकी हुन् ।

लुम्बिनी लायन्सले नायक राजेश हमाललाई ब्रान्ड एम्बास्डर बनाएको छ । राजेश हमाल नेपाली चलचित्र उद्योगका निम्ति एक गर्विलो नाम हो । ठूलो संख्यामा फ्यान फलोइङ रहेका उनी जहाँ उपस्थित हुन्छन्, त्यहाँ आकर्षणको केन्द्र बन्छन् ।

चलचित्रमा काम नगरे पनि राजेश थुप्रै प्रोडक्टको ब्रान्ड एम्बास्डर हुँदै आएका छन् । आधा दशकभन्दा लामो समयदेखि उनले फिचर फिल्ममा काम गरेका छैनन् । यद्यपि, उनले केही समयअगाडि ‘नरसिंहा अवतार’को छायांकन सकाएका छन् । लामो अन्तरालपछि राजेशको यो चलचित्र अबको केही महिनापछि रिलिज हुनेछ ।

विराटनगर किंग्सले अभिनेता दयाहाङ राईलाई ब्रान्ड एम्बास्सडर नियुक्त गरेको छ । भोजपुरमा जन्मिएका दयाहाङ हालका पहिलो रोजाइका अभिनेता हुन् ।

राम्रो फ्यान फलोइङ भएका दयाहाङको ‘लुट’ र ‘कबड्डी’ सिरिज हिट छ । चरित्रको गहिराइमा गएर अभिनय गर्ने अभिनेताको छवि बनाएका उनका चलचित्रको दर्शकमा राम्रो प्रतीक्षा हुने गरेको छ ।

विराटनगर किंग्सले नै रचना रिमाललाई पनि अनुबन्ध गरेको छ । रचना यो टिमको फेस अफ किंग्स हुन् । सुगम संगीतको विधामा पछिल्लो पुस्तामा पहिलो रोजाइमा रहेकी उनी सामाजिक सञ्जालमा राम्रो रेस्पोन्स पाउने गायिका हुन् ।

खेलप्रति विशेष रुचि राख्ने रचना काठमाडौंमा हुँदा क्रिकेटका अधिकांश म्याच छुटाउँदिनन् । क्रिकेटरलाई प्रोत्साहन गर्न उनी म्याचका तस्बिर सामाजिक सञ्जालमा पोस्ट गरिरहन्छिन् ।

कलाकारलाई विराटनगर किंग्सले निकै महत्त्व दिएको छ । कलाकारलाई दिएको स्थान र अनुबन्ध हेर्दा त्यो प्रस्ट हुन्छ ।

र्‍यापर कुशल पोखरेललाई विराटनगर किंग्सले भ्वाइस अफ विराटनगर भनेर अनुबन्ध गरेको छ । विराटनगर किंग्सको एन्थम सङ पनि कुशलले गाएका हुन् । सामाजिक सञ्जालमा यो गीतले चर्चा पाइरहेको छ ।

कुशलको र्‍याप ‘पैसा’ लोकप्रिय छ । ‘पैसा’ भारतको वेबसिरिज ‘ताजा खबर’ले टाइटल सङको गीतमा प्रयोग गरेको छ ।

पोखरा एभेन्जर्सले कलाकार सन्दीप क्षेत्रीलाई अनुबन्ध गरेको छ । सन्दीपलाई ब्रान्ड एम्बास्डरका रूपमा विराटनगर किंग्सले अनुबन्ध गरेको हो ।

सन्दीप टेलिभिजन प्रस्तोतासँगै कलाकार पनि हुन् । उनले थुप्रै चलचित्रमा काम गरेका छन् । गएको दसैँमा रिलिज भएको चलचित्र ‘ज्वाइँ साब’मा पनि उनले अभिनय गरेका छन् । उनले कमेडियनका रूपमा स्टेज प्रोगाममा पनि राम्रो स्थान पाउँदै आएका छन् ।

नेपाली क्रिकेट टिमले ट्वान्टी–२० विश्वकप खेल्न थालेयता नेपालमा यसको क्रेज बढ्दै गएको छ । 

विराटनगर किंग्सको मार्की खेलाडीमा सन्दीप लामिछाने छन् । जनकपुर बोल्ट्सको मार्की खेलाडी आसिफ शेख, काठमाडौं गुर्खाजको करण केसी, चितवन राइनोजको मार्की खेलाडी कुशल मल्ल हुन् । पोखरा एभेन्जर्सको मार्की खेलाडी कुशल भुर्तेल, कर्णाली याक्सको सोमपाल कामी, लुम्बिनी लायन्समा रोहित पौडेल मार्की खेलाडी छन् । सुदूरपश्चिम रोयल्सको मार्की खेलाडी दीपेन्द्रसिंह ऐरी हुन् ।

लिगका खेल, टिम र खेलाडीलाई कलाकारले हौसला प्रदान गर्नेछन् । सामाजिक सञ्जाल र खेलस्थलमा पुगेर कलाकारले आफ्नो टिमलाई बुस्टअप गर्नेछन् ।