काठमाडौं । कलाकार श्रीकृष्ण सिंखडाले नयाँ गीत सार्वजनिक गरेका छन् । ‘घाँस दाउरा पानी’ सार्वजनिक गरेका छन् । गीतमा शब्द, संगीत र स्वर सिंखडा स्वयंको छ । संगीत संयोजन सञ्जय खड्गीको छ ।

नेपाली ग्रामीण परिवेशलाई गीतले समेटेको छ । “गाउँमा बस्ने अधिकांश नेपालीको जीवन घाँस, दाउरा, पानी र हलो गर्दै बित्छ,” सिंखडा भन्छन्, “तर, अहिले गाउँका युवा विदेशमा छन् । गाउँ रित्तो भएको छ ।” 

रित्तिएका गाउँका देउराली परिदेसिएका युवालाई पर्खिएर बसिरहेको वास्तविकता गीतले उठान गरेको उनले बताए । गीतले समाजको वास्तविकतालाई उजागर गरेको उनको भनाइ छ । 

केही समयअगाडि उनको अर्को गीत ‘हारेर हेर जिन्दगीमा’ सार्वजनिक भएको थियो । यो गीत समग्र मानवको स्वभाव र त्यसले सिर्जना गरेको परिस्थितिमा केन्द्रित रहेको उनी बताउँछन् । 

“अहिले हरेक मानिस आफू जित्न चाहन्छ । जित्ने दौडमा रहेको मानिस हार्न चाहँदैन । तर, एउटाले नहारी अर्कोले जित्दैन,” सिम्खडा भन्छन्, “समाजको यो लडाइँलाई गीतले समेटेको छ ।” 

पछिल्लो समय उनी कविता वाचनमा पनि केन्द्रित छन् । विद्यालयमा पुगेर उनले कविता वाचन गर्दै आएका छन् । बालमनोविज्ञानमा कविताप्रति सकारात्मक छाप परोस् भनेर विद्यालयमा कविता वाचन गर्ने गरेको उनले बताए ।