काठमाडौं । एनएलजी इन्स्योरेन्स कम्पनी लिमिटेडको हकप्रद सेयरमा आज (मंसिर ११ गते)देखि आवेदन दिन सकिनेछ । गएको कात्तिक २६ गतेसम्म कायम सेयरधनीले कम्पनीको हकप्रद सेयरमा आवेदन दिन सक्नेछन् ।

इन्स्योरेन्सले हाल कायम चुक्ता पुँजीको ६२.२५६ प्रतिशत हकप्रद सेयर निष्कासन गर्न लागेको हो । यो कम्पनीको १०० कित्ता सेयर हुनेले ६२.२५६ कित्ता सेयरमा आवेदन दिन सक्नेछन् ।

हकप्रद सेयर निष्कासन प्रयोजनार्थ इन्स्योरेन्सले कात्तिक २७ गते बुक क्लोज गरेको थियो । कात्तिक २६ गतेसम्म नेप्सेमा कारोबार भई कायम सेयरधनीले उक्त हकप्रद सेयरका निम्ति आवेदन दिन सक्नेछन् । इन्स्योरेन्सको हकप्रद सेयरमा आउँदो पुस १ गतेसम्म आवेदन दिन सकिनेछ ।

इन्स्योरेन्सले ९६ करोड ३१ लाख २२ हजार २२ रुपैयाँबराबरको प्रतिसेयर १०० रुपैयाँअंकित मूल्यका ९६ लाख ३१ हजार २२०.२२ कित्ता हकप्रद सेयर निष्कासन गर्नेछ ।

इन्स्योरेन्सको सेयर निष्कासन तथा बिक्री प्रबन्धक लक्ष्मी सनराइज क्यापिटल लिमिटेड रहेको छ । लगानीकर्ताले बिक्री प्रबन्धकका साथै एनएलजी इन्स्योरेन्सका केन्द्रीय तथा क्षेत्रीय कार्यालय र लक्ष्मी सनराइज बैंकका काठमाडौं उपत्यकाबाहिरका तोकिएका शाखा कार्यालयबाट आवेदन दिन सक्नेछन् । त्यस्तै, नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाबाट सी–आस्वा प्रणालीमार्फत पनि आवेदन दिन सकिनेछ ।

यसका साथै सीडीएस एन्ड क्लियरिङ लिमिटेड (सीडीएससी)ले विकास गरेको मेरोसेयर वेबसाइटमार्फत आवेदन दिन सकिने जनाइएको छ ।