काठमाडौं । सरस्वती युथ क्लबले थ्री बाई थ्री स्ट्रीट विश्व फुटबल च्याम्पियनसिप खेल्ने भएको छ । ‘बी’ डिभिजन सरस्वती क्लबको प्रतिनिधित्व गर्दै पानमा नेपालका खेलाडीले चीनको क्वीन्डहोमा यही मंसिर ११ देखि १६ गतेसम्म हुने च्याम्पियनसिप खेल्न लागेका हुन् ।

विश्व फुटबल महासंघ (फिफा)अन्तर्गत आईएसएफएले सञ्चालन गर्ने उक्त च्याम्पियनसिपमा आयोजक चीनसहित २४ देशको सहभागिता रहनेछ । चीन जाने टोलीलाई सरस्वती क्लबका अध्यक्ष उत्तम भण्डारी, वाग्मती प्रदेशसभा सदस्य सुनिल केसी, क्लबका पूर्वअध्यक्ष बलराम ढकाल र सल्लाहकार अच्युत पराजुलीले बिदाइ गरे ।

सात सदस्यीय नेपाली टोली आइतबार चीन प्रस्थान गर्नेछ । टोलीका खेलाडीमा दिपेश घले, पेम्बा दोर्जे लामा, सतिश पराजुली, शुभांशु शर्मा र दिभांशु शर्मा छन् । प्रशिक्षकमा असीम अर्याल र व्यवस्थापकमा विकल्प खरेल छन् ।

उपाधि जित्ने लक्ष्यका साथ आफूहरूले दुई महिनादेखि निरन्तर तयारी गरेको प्रशिक्षक अर्यालले बताए । उनका अनुसार, फुटसलभन्दा सानो कोर्टमा खेलिने थ्री बाई थ्री फुटबल आठ मिनेटको हुनेछ ।