काठमाडौं । उपनिर्वाचनअन्तर्गत काठमाडौंको कीर्तिपुर नगरपालिकाको मेयर पदका निम्ति हालसम्म १५ जनाले उमेदवारी दिएका छन् । आइतबार दिउँसो ३ बजेसम्म स्वतन्त्र आठ र दलका तर्फबाट सात गरी १५ जनाले मनोनयनपत्र दर्ता गराएका सहायक निर्वाचन अधिकृत पुरुषोत्तम पौडेलले बाह्रखरीलाई जानकारी दिए ।

यस्तै, कीर्तिपुर–१ को वडाध्यक्ष पदका निम्ति स्वतन्त्र दुई र दलका तर्फबाट पाँच गरी सातजनाले उमेदवारी दिएका छन् ।

कीर्तिपुर–४ को वडाध्यक्ष पदका निम्ति स्वतन्त्र चार र दलका तर्फबाट ६ गरी १० जनाले उमेदवारी दर्ता गराएका पौडेलले बताए ।

उमेदवारी दर्ता कार्य जारी छ । निर्वाचन आयोगले आज बिहान १० देखि अपराह्न ५ बजेसम्म उमेदवारको मनोनयनपत्र दर्ताको समय निर्धारण गरेको छ ।

स्थानीय तहका रिक्त ४२ पदका निम्ति यही मंसिर १६ गते मतदान हुँदै छ ।