नयाँ दिल्ली । भारतीय अस्पतालमा आगलागी हुँदा १० नवजात शिशुको मृत्यु भएको छ । १६ शिशुको अवस्था गम्भीर रहेको अधिकारीहरूले शनिबार बताएका छन् ।

अधिकारीका अनुसार, शुक्रबार राति करिब १०ः३० बजे झाँसीको महारानी लक्ष्मीबाई मेडिकल कलेजको एनआईसीयूमा आगलागी भएको थियो । घटनास्थलको फुटेजमा वार्डभित्र जलेको बिस्तरा र पर्खालहरू देखिएको थियो । आक्रोशित परिवारहरू अस्पतालबाहिर पर्खिरहेका थिए ।

यस्तै, आगलागीबाट उद्धार गरिएका शिशुहरूलाई सुरक्षित ठाउँमा राखिएको थियो ।

आगलागीमा १० शिशुको मृत्यु भएको उत्तर प्रदेशका उपमुख्यमन्त्री ब्रजेश पाठकले पत्रकारहरूलाई बताएका छन् । उनका अनुसार, सात शवको पहिचान भइसकेको छ । तीन शवको हालसम्म पहिचान हुन सकेको छैन । आगलागीको कारणबारे अनुसन्धान गरी जिम्मेवारहरूमाथि कडा कारबाही गरिने पाठकले जनाएका छन् ।

प्रमुख जिल्ला अधिकारी अविनाश कुमारले युनिटमा विद्युतीय सर्टसर्किटका कारण आगलागी भएको बताएका छन् ।

स्थानीय सञ्चारमाध्यमले अधिकारीहरूलाई उद्धृत गर्दै वातावरणमा अक्सिजनको स्तर बढाउन प्रयोग गरिने मेसिनरीको टुक्रामा आगलागी भएको जनाएका छन् ।

प्रधानमन्त्री नरेन्द्र मोदीले सामाजिक सञ्जाल एक्समार्फत बालबालिकाको मृत्युलाई ‘हृदयविदारक’ घटना भन्दै निर्दोष सन्तान गुमाउनेहरूप्रति समवेदना व्यक्त गरेका छन् ।

उत्तर प्रदेशका मुख्यमन्त्री योगी आदित्यनाथले शोकाकुल परिवारलाई पाँच लाख रुपैयाँ  क्षतिपूर्ति दिने घोषणा गर्दै सम्बन्धित अधिकारीहरूलाई राहत र उद्धार कार्य गर्न निर्देशन दिएका छन् । रासस/एएफपी