चितवन । आन्तरिक राजस्व कार्यालय भरतपुरले १४६ करदाताको बैंक खाता रोक्का गरेको छ । कार्यालयले एक लाखभन्दा बढी बक्यौता हुने ती करदातालाई कालोसूचीमा राखेर उनीहरूको बैंक खाता रोक्का गरेको हो ।

कार्यालयका सूचना अधिकारी एवं कर अधिकृत विमल पौडेलका अनुसार, कालोसूचीमा राखिएका करदातालाई पत्राचार गर्ने, सम्पर्क गर्ने, सूचना जारी गर्दासमेत सम्पर्कमा नआएपछि उनीहरूको बैंक खाता रोक्का गरिएको हो ।

कार्यालयमा रहेका करदतामध्ये ४९५ करदाताले मूल्य अभिवृद्धि करको ६५ करोड ९७ लाख बक्यौता तिर्न बाँकी छ । त्यस्तै, आयकरतर्फ ३२३ करदाताले ९४ करोड बक्यौता तिर्न बाँकी छ ।

कार्यालयमा हाल मूल्य अभिवृद्धि करतर्फ १० हजार ४०० करदाता छन् भने जम्मा करदाता ५८ हजार ४५५ रहेको पौडेलले जानकारी दिए ।

पौडेलका अनुसार, कार्यालयले चालु आर्थिक वर्षमा छ अर्ब ६२ करोड राजस्व संकलन गरेको छ । जुन लक्ष्यको ८८.३६ प्रतिशत हो । राजस्व विभागले चालु आवको कात्तिक मसान्तसम्ममा सात अर्ब ६६ करोड ५९ हजार राजस्व संकलनको लक्ष्य दिएको थियो ।

चाडपर्व, व्यावसायिक गतिविधिमा कमी, कर सहभागितामा कमीलगायत कारण लक्ष्यअनुसार राजस्व संकलनमा कमी आएको छ । रासस