काठमाडौं । निर्देशक शंकर घिमिरेले ‘तेल भिसा’ व्यंग्यात्मक नाम भएको बताएका छन् । काठमाडौंका सोमबार (आज) पत्रकार सम्मेलन गर्दै उनले रमाइलो हिसाबले ‘तेल भिसा’ व्यंग्यात्मक नाम राखिएको घिमिरेले बताए । 

“सबै बाबुआमालाई तेल लगाउन मात्रै छोराछोरीले विदेश बोलाउँदैनन् । अरु प्रयोजन पनि हुन्छ,” उनले भने । 

विदेशी भूमिमा कानुन नबुझ्दा नेपालीले थुप्रै समस्या भोगिरहेको भन्दै उनले त्यस्तै घटना चलचित्रमा समेटिएको उनले बताए । धेरै कथा वास्तविक घटनामा आधारित रहेको उनको भनाइ छ । 

अभिनेता विपीन कार्कीले डबल रोल गर्न निकै कठिन भएको बताएका छ । ‘तेल भिषा’मा उनी दोहोरो भूमिका छन् । “मलाई एउटै क्यारेक्टर गर्न पनि कठिन हुन्छ । दुईटा भनेपछि त झन कठिन हुने नै भयो,” विपीन भन्छन्, “तर, दोहोरो भूमिका छ भन्नवित्तिकै मैले क्यारेक्टरबारे सोच्न थालेको थिएँ ।” 

यद्यपि, एउटा रोल नेपालमा र एउटा रोल अमेरिकामा गरेकाले केही सहज भएको उनको भनाइ छ । “मलाई त दुईवटा सिनेमामा काम गरेजस्तो भयो,” ठट्टा गर्दै विपीन भन्छन्, “मलाई त घाटा लागेजस्तो लागिरहेको छ, दुईवटा सिनेमाको काम एउटैमा गरेजस्तो लागिरहेको छ ।” 

अभिनेत्री तथा निर्माता ऋचा घिमिरे विपीनका कारण काम गर्न सहज भएको बताउँछिन् । उनको सरलपनले सिनेमाको काम गर्न सहज भएको उनले स्पष्ट पारिन् । 

“उहाँ (विपीन) अनस्क्रिन मात्रै होइन, अफ स्क्रिन पनि त्यति नै सरल हुनुहुन्छ । उहाँको जुन स्टारडम छ, त्यही अनुसार उहाँको व्यवाहार हुने हो भने अमेरिकामा काम गर्न सहज थिएन,” ऋचा भन्छिन्, “स्टारडम र क्वालिटीअनुसार विपीन ५० लाख मात्रै होइन एक करोड रुपैयाँ डिजर्व गर्ने कलाकार हो ।”

विपीनको एक्टिङ पावरले सिनेमालाई ब्रान्डिङ गर्ने भन्दै उनको पारिश्रमिकलाई धेरै भन्न नमिल्ने उनको भनाइ छ । 

शंकर घिमिरेको लेखन तथा निर्देशनमा निर्माण भएको चलचित्र ‘तेल भिसा’मा अभिनेता विपीन कार्की बृद्ध र जवानसहित दोहोरो भूमिकामा छन् ।

विपीनसँगै वर्षा राउत, पूजा चन्द, ऋचा घिमिरे, बुद्धि तामाङ, सुचित्रा उप्रेती र विदेशी कलाकारहरुको यो चलचित्रमा अभिनय रहेको छ ।

अनिल पाण्डे र शिवराज कार्कीको लगानी रहेको चलचित्रका कार्यकारी निर्माता प्रिन्स युवराज कार्की र श्रुती दाहाल हुन् । ‘तेल भिसा’ मंसिर ७ गते रिलिज हुँदै छ ।