अन्तर्राष्ट्रिय विमानस्थलहरू निर्माण गर्ने उत्साहमा तिनको उपयोगिता र सम्भाव्यताका विषयमा सरकारी अधिकारीहरूले खासै ध्यान नदिँदा अहिले दुवै विमानस्थल ‘निल्नु न उकेल्नु’ भनेजस्तो भएका छन् ।  निर्माणका लागि लिइएको ऋण तिर्न त परै जाओस् विमानस्थलले सञ्चालन खर्चसमेत धान्न सकेका छैनन् ।

यसैबीच भैरहवास्थित गौतमबुद्ध अन्तर्राष्ट्रिय विमानस्थलमा शनिबार तीन विमान सेवाले उडान अन्तर्राष्ट्रिय उडान गर्दा स्थानीयमात्र होइन पर्यटनसँग सम्बन्धित सबै उत्साहित भए । यद्यपि, नेपालको पर्यटन केन्द्र मानिने पोखरावासी भने भैरहवासँगै पोखरामा उडान नभएकोमा चिन्तित र असन्तुष्टसमेत देखिएका छन् ।

यता त्रिभुवन अनतर्राष्ट्रिय विमान स्थल मर्मतका लागि दिनको १० घन्टा बन्द गरिएको छ । पर्यटक नेपाल आउने याममै मुख्य विमानस्थल दिनहुँ १० घन्टा बन्द हुँदा चिन्तित पर्यटन व्यवसायीलगायतका लागि समेत भैरहवामा अन्तर्राष्ट्रिय उडान सुरु हुनु  उत्साहको विषय हो । 

पोखरा विमानस्थलको आर्थिकमात्र होइन प्राविधिक पक्ष र क्षमताको विषयमा पनि सुरुदेखि नै प्रश्न उठेको हो । सरकारले भने कहिल्यै ती प्रश्नहरूको चित्त बुझ्दो उत्तर जनतालाई दिन चाहेन । संसदीय अध्ययन टोलीले समेत चित्त बुझ्दो र स्पष्ट उत्तर पाउन सकेन ।

यस्तो अवस्थामा सरकारले भैरहवा विमानस्थलबाट सकेसम्म धेरै अन्तर्राष्ट्रिय उडान गराउन चाहेको देखिन्छ । सरकारी प्रोत्साहनकै कारण भैरहवामा उडान सुरु गर्न वायुसेवाहरू तयार भएका हुन् । यसबाट अतिरिक्त प्रोत्साहन दिइएमा पोखराबाट पनि उडान  हुनसक्ने सम्भवना प्रकट भएको छ । 

एकातिर भैरहवा र पोखराबाट अन्तर्राष्ट्रिय उडान गर्न वायुसेवाहरूलाई प्रोत्साहित गर्नुपर्ने अवस्था छ भने अर्कातिर हालका दिन बढेको हवाई भाडा नियन्त्रण गर्नुपर्ने बाध्यता पनि सरकारलाई आइपरेको छ । यसैले सम्बद्ध सबै पक्षले ‘उपभोक्तालाई मर्का पर्नेगरी अनुचित हवाइ भाडा असुल गर्न नहुने’ विषयमा सहमति गरेको हुनुपर्छ । 

भैरहवा उडानका लागि तयार भएका वायुसेवालाई प्राविधिकरूपमा सम्भव भएमा पोखरा हुँदै फर्कने र भैरहवा ओर्लने यात्रुहरूलाई नजिकको विमानस्थलसम सहजरूपमा ओसार्ने व्यवस्था भएमा सम्भवतः  धेरै समस्याको हल हुनेछ । तर, यसका लागि राजनीतिक नेतृत्वले नै विशेष ध्यान दिनु आवश्यक हुनेछ ।

वायुसेवाहरूलाई भैरहवा उडान गर्न काठमाडौं विमानस्थलको मर्मतसम्मका लागि मात्रै प्रोत्साहित  गर्ने रणनीति हो भने त्यसमा अहिले नै पुनर्विचार गर्नु बुद्धिमानी हुनेछ । सरकारी कर्मचारीहरू सधैँ नै कुनै काम अलिकति राम्ररी सञ्चालन हुन थाल्यो भने त्यसलाई कसरी अप्ठेरो बनाउने र दस्तुरी र सलामी उठाउने दाउमा हुन्छन् । त्यसो हुन नदिन पनि राजनीतिक नेतृत्व सजग हुनुपर्छ ।

यस्तै, भैरहवा र पोखरामा पनि यात्रुहरूले काठमाडौंकै  असुविधा र अव्यवस्था भोग्न नपरोस् भनेर पनि ध्यान दिइयोस् । यात्रु र वायुसेवामाथि झन्झट थप्ने रकमी व्यवहार भैरहवा र पोखरामा दोहोरिन दिनु हुँदैन । नियमहरू यात्रुको सुरक्षा र सुविधाका लागि हो कर्मचारीको सजिलो र हैकमका लागि होइन भन्ने यथार्थ राजनीतिक नेतृत्वले  बुझ्नु जरुरी हुन्छ । नत्र अहिलेका सबै प्रयत्न व्यर्थ हुनेछ ।