काठमाडौं । भारतको बैंगलुरु प्रहरीले १५.१ करोड भारतीय रुपैयाँ (करिब २४.१६ करोड नेपाली रुपैयाँ) र सुन चोरी गरेको आशंकामा नेपाली दम्पतीको खोजी गरिरहेको छ । उनीहरूमाथि पश्चिमी बैंगलुरुको विजयनगरस्थित आफ्नो रोजगारदाताको घरबाट नगद र सुन चोरी गरेको आरोप छ ।

होसहल्लीमा अरिहन्त ज्वेलर्सका सञ्चालक सुरेन्द्रकुमार जैनले यही नोभेम्बर ७ मा आफ्नो घरबाट १५.१ करोड भारुबराबरका सामान हराएको भन्दै कर्मचारी नमराज र उनकी श्रीमतीमाथि आशंका व्यक्त गर्दै उजुरी दिएका थिए । जैनका अनुसार, उनले आफ्नी श्रीमती, आमा र बहिनीका गरगहनाका साथै व्यवसायबाट भएको आम्दानी घरको ‘लकर’मा राखेका थिए ।

जैनका अनुसार, नमराज ६ महिनाअघि उनको ज्वेलरी पसलमा सहयोगीका रूपमा आएका थिए । नमराजलाई जैनले आफ्नै घरको सेक्युरिटी कोठामा बस्ने व्यवस्था समेत मिलाइदिएका थिए । नमराज आफ्नी श्रीमतीका साथ सोही कोठामा बस्थे र जैनलाई काममा सघाउँथे ।

एक वरिष्ठ प्रहरी अधिकारीका अनुसार, नमराजले पछिल्लो ६ महिनामा जैनको विश्वास जितेका थिए । घरको साँचोमा समेत उनको पहुँच थियो । यस अवधिमा उनले जैनले नगद र बहुमूल्य सामानहरू राखेका लकर पनि हेरेका थिए ।

प्रहरी अधिकारीका अनुसार, जैन र उनको परिवार नोभेम्बर १ मा धार्मिक मेलाका निम्ति गुजरात गएका थिए । सोही मौकाको फाइदा उठाउँदै नमराजले आफ्नी श्रीमती र दुई अज्ञात व्यक्तिसँग मिलेर घरमा पसी बहुमूल्य सामानहरू चोरेको आरोप लगाइएको छ ।

उक्त घटनापछि नमराज भागेर नेपाल आएको प्रहरीको आशंका छ । प्रहरीले नमराज र उनकी श्रीमतीको खोजी गरिरहेको छ । डेक्कन हेराल्डबाट ।