काठमाडौं । काठमाडौं महानगरले यस वर्ष रानीपोखरी छठका लागि खुल्ला नगर्ने बताएको छ । ०६३ यता छठका लागि रानीपोखरी खुल्ला गरिँदै आएको थियो । 

०७२ को भूकम्पपछि भने छठमा रानीपोखरीमा सामान्य पूजापाठ मात्र हुन्थ्यो । रानीपोखरीको पुनर्निर्माणपछि महानगरले ०७९ यता छठ मनाउन दिएको छैन । महानगरका अनुसार यस वर्ष रानीपोखरीबाहेक महानगरभित्रका अन्य पोखरी र नदी किनारमा भने छठ मनाउन पाइनेछ । 

काठमाडौं महानगरका मेयर बालेन शाहका मिडिया सहजकर्ता सुरेन्द्र बजगाईंका अनुसार रानीपोखरीको सांस्कृतिक महत्त्व छठसँग नभई भाइटीकासँग जोडिएको हुँदा छठका लागि रानीपोखरी खुल्ला नगर्ने तय भएको हो । उनी भन्छन्, “रानीपोखरीको सांस्कृतिक र परम्परागत विरासत भाइटीकासँग जोडिएको छ । त्यसैले रानीपोखरी छठ मनाउने ठाउँ होइन ।”

महानगरभित्रका अन्य पोखरी र नदी किनारमा भने छठ मनाउन पाइने बजगाईंले बताए । “छठको आफ्नै सांस्कृतिक महत्त्व छ । रानीपोखरीको आफ्नै सांस्कृतिक विरासत छ त्यसैले रानीपोखरी यसपटक छठका लागि खुल्ला हुँदैन,” बजगाईंले भने । 

०६३ यता रानीपोखरीमा मनाइने छठमा राष्ट्रपति, प्रधानमन्त्रीको पनि उपस्थित हुन्थ्यो । यस वर्ष २२ कार्तिकमा छठ पर्व परेको छ । भाइटीकाका लागि उक्त दिन मात्र खुल्ने रानीपोखरीको सांस्कृतिक पहिचान जोगाउन भनेर महानगरले रानीपोखरीमा छठ मनाउन नदिने बताएको छ ।