काठमाडौं । चलचित्र ‘अग्निदहन’को ‘दाइ दाइ नभन मलाई’बोलको गीत सार्वजनिक भएको छ । गीतमा पार्वती जिसी र तुलसी क्षेत्रीको स्वर छ । परशुराम अधिकारीको संगीत रहेको गीतमा लोकमणि पौडेलको शब्दरचना छ ।

गीतको भिडियोमा अनुपमा भण्डारी, प्रमिला तुलाचन, रमा त्रिपाठी, सनिशा भट्टराई, तुलसी क्षेत्री, सरला कुमारी पाण्डे, प्रसिना आचार्यलगायत छन् ।

विवाहको सेटअपमा तयार परिएको गीतमा रत्यौली खेल्दै गाइने झ्याउरे लय छ । भिडियोमा रत्यौलीमा महिलाहरू लोग्ने मान्छे बनेर नाच्ने प्रचलनलाई देखाइएको छ । 

साहित्यकार तथा पत्रकार लोकमणि पौडेलको उपन्यास ‘अग्निदहन’ मा आधारित रहेर निर्माण गरिएको शिक्षामूलक सामाजिक चलचित्र मंसिर ७ गते रिलिज हुने निर्देशक घनश्याम लामिछानेले बताएका छन् । 

यो चलचित्रले मान्छे ‘बोक्सी’ हुँदैन भन्ने सन्देश दिन निर्माण गरिएको निर्देशकले बताएका छन् । 

“चलचित्रमा थ्रिल, सस्पेन्स सबै छ । उपन्यासलाई हामीले सिनेम्याटिक तवरबाट चलचित्रमा रुपान्तरण गरेका छौँ । दर्शकले सन्देश र उत्सुकता दुवै पाउनुहुनेछ”, उनले भने । 

चलचित्रमा मुख्य भूमिकामा प्रकाश घिमिरे, प्रमिला तुलाचन, माओत्से गुरुङ, अनुपमा भण्डारी, तुलसी क्षेत्री, विष्णु वास्तोला, ताराबहादुर गुरुङलगायतको अभिनय छ । लोकमणि पौडेलको कथा, पटकथा र संवाद, कोविदशरण उपाध्यायको परिकल्पना छ ।