काठमाडौं । नेपाल समाजवादी पार्टी (नयाँ शक्ति)का संयोेजक डा. बाबुराम भट्टराईले लामो संघर्ष र बलिदानको उपलब्धिका रूपमा प्राप्त नेपालको संविधानको संरक्षण र लोकतन्त्रको सुदृढीकरणका निम्ति परिवर्तनकारी शक्तिबीच साझा धारणा र एउटै बुझाइ आवश्यक रहेको बताएका छन् ।

शनिबार राजधानीमा आयोजित पत्रकार भेटघाटमा उनले संघीयता र गणतन्त्रसहितको उपलब्धिलाई संरक्षण र सम्वर्द्धन गर्दै लैजानुपर्ने आजको आवश्यकता भएको स्पष्ट पारे ।

पूर्वप्रधानमन्त्री भट्टराईले भने, “मुलुकमा राजनीतिक परिवर्तनका लागि विभिन्न कालखण्डमा भएका आन्दोलनमा दुःख, कष्ट भोगेका राजनीतिक नेतृत्वले जनताका एजेन्डाका आधारमा विकास र समृद्धिमा फड्को मार्न नसक्दा नयाँ शक्तिको उदय भयो । तर, उनीहरू पनि व्यवस्थित हुन सकिरहेको देखिन्न ।”

लोकतन्त्रका निम्ति योगदान पुर्‍याएका पुरानालाई सुधार्ने तथा नयाँ शक्तिलाई व्यवस्थित तुल्याएर आमसहमतिका आधारमा अघि बढनुपर्ने आवश्यकता रहेको उनले बताए ।

संयोजक भट्टराईले लोकतान्त्रिक गणतन्त्रभित्रै नयाँ शक्ति निर्माण गर्न सकिने तर्क गरे । उनले भने, “वैकल्पिक नयाँ शक्ति अग्रगामी सोचसहितको हुनुपर्छ, पुराना वादबाट अब मुलुक चल्दैन । संघीयतालाई पनि परिस्कृत गर्दे लैजानुपर्छ ।”

केही दिनअघि विधान अधिवेशन सम्पन्न गरिएको नयाँ शक्तिको आउँदो माघ २५ देखि २७ गतेसम्म काठमाडौंमा राष्ट्रिय अधिवेशन गरिँदै छ । पार्टीका सबै तहका समिति प्रत्यक्ष प्रणालीबाट निर्वाचित हुनुपर्छ भन्ने मान्यता राख्ने उक्त राजनीतिक शक्तिले पालिकामा प्रतिनिधित्व ४०, प्रदेशमा ३० र केन्द्रमा २० प्रतिशत हुने संरचना तयार गरेको छ ।

उक्त पार्टीले पदाधिकारीसहित सबै समितिमा ३३ प्रतिशत महिलाको प्रतिनिधित्व रहने निश्चित गरेको छ । समिति निर्वाचित समानुपातिक समावेशी प्रणाालीको नीतिअनुसार हुने पार्टीले जनाएको छ । रासस