कोलकाता । भारतको पूर्वी तटमा कम्तीमा १० लाखभन्दा बढी मानिस सुरक्षित आश्रयस्थलतर्फ गइरहेका मन्त्रीहरूले बिहीबार बताएका छन् ।  

चक्रवात दानाले पश्चिम बंगाल र ओडिसा राज्यमा लगभग १५ करोड मानिसको आश्रयस्थललाई प्रभावित गर्ने सम्भावना रहेको भारतीय मौसम ब्युरोले जनाएको छ ।

मौसम ब्युरोले हावा १२० किलोमिटर प्रतिघण्टाको गतिमा पुग्ने अनुमान गरेको छ । चक्रवातको समयमा प्रमुख एयरपोर्टहरू बन्द गरिने जनाइएको छ  ।

शुक्रबार बिहान धामरा बन्दरगाहनजिकै अवतरण गर्ने पूर्वानुमान गरिएको चक्रवातले छिमेकी बंगालादेशमा समेत असर गर्ने अनुमान छ ।

चक्रवातका कारण आउने छालले तटीय क्षेत्र डुबानमा पार्ने र पानी सामान्य ज्वारको स्तरभन्दा दुई मिटर माथि बढ्ने पूर्वानुमान गरिएको छ ।

ओडिसा राज्यका स्वास्थ्यमन्त्री मुकेश महालिङले तटीय क्षेत्रबाट करिब १० लाख मानिसलाई चक्रवातबाट सुरक्षित स्थानमा सारिएको बताएका छन् ।

छिमेकी पश्चिम बंगाल राज्यका मन्त्री बङ्किम चन्द्र हजाराले एक लाखभन्दा बढी मानिसलाई सुरक्षित स्थानमा सारिएको बताएका छन् । उनले जीवन बचाउन समुद्र तटका रिसोर्ट तथा व्यवसाय बन्द गर्न आदेश दिइएको तथा पर्यटकलाई उक्त स्थान छोड्न आग्रह गरिएको जनाएका छन् ।

कोलकाता विमानस्थलका निर्देशक प्रवत रञ्जन बेउरियाले पूर्वानुमान गरिएको तीव्र हावा र वर्षाका कारण बिहीबार राति उडान स्थगित गरिने बताएका छन् ।

भुवनेश्वर सहरको विमानस्थलले पनि उक्त समयमा उडान बन्द गर्ने जनाएको छ । कैयाँै रेल सेवा स्थगित गरिएका छन् ।

बंगलादेशका विपद्मन्त्री फारुक–ए–आजमले उद्धार अधिकारी उच्च सतर्कताका साथ बसेको बताउँदै भारतमा पनि खराब आँधी आउने पूर्वानुमान गरिएकाले निकासी आदेश जारी नगरिएको बताएका छन् । 

वैज्ञानिकका अनुसार, जीवाश्म इन्धन जलाइँदा उत्पन्न जलवायु परिवर्तनका कारण विश्व तातो हुँदै जाँदा चक्रवात तथा आँधीबेहरी अझै शक्तिशाली हुँदै गइरहेका छन् । रासस/एएफपी