पाटन (ललितपुर) । गत असोज ११ र १२ गतेको बाढीपहिरोले प्रभावित भएका ललितपुर र काठमाडौंका ६ स्थानीय तहलाई ललितपुर महानगरले आर्थिक सहयोग गर्ने भएको छ ।

बुधबार बसेको महानगर कार्यपालिका बैठकले ललितपुरका पाँच स्थानीय तहलाई ५० लाख र काठमाडौंको दक्षिणकाली नगरपालिकालाई एक करोड रुपैयाँ उपलब्ध गराउने निर्णय गरेको महानगर प्रमुख चिरीबाबु महर्जनले जानकारी दिए ।

“ललितपुरका गोदावरी र महालक्ष्मी नगरपालिका, वाग्मती, महाकाल र कोन्ज्योसोम गाउँपालिकालाई ५० लाख र काठमाडौंको दक्षिणकाली नगरलाई एक करोड दिने निर्णय भएको छ,” उनले भने, “विपद् व्यवस्थापनमा सहयोग पुगोस् भनेर सहयोग गरेका हौँ । समस्या परेका बेला छिमेकी पालिकालाई सहयोग गर्नु हाम्रो धर्म हो, यो सहयोगले बिग्रिएका, भत्किएका संरचना पुनर्निर्माण गर्न र जनजीवन सहज बनाउन सहयोग पुग्ने विश्वास लिएका छौँ ।”

ललितपुरको दक्षिण भेगमा रहेका गोदावरी, महांकाल, कोन्ज्योसोम र वाग्मतीलाई संघीय सरकार र प्रदेश सरकारले विपद् संकटग्रस्त पालिका घोषणा गरेका छन् । रासस