काठमाडौं । सरकारले कीर्तिपुरस्थित त्रिभुवन विश्वविद्यालयको क्रिकेट मैदानमा फ्लडलाइट र प्यारापिट निमार्णको काम सुरु गरेको जनाएको छ ।

प्रधानमन्त्री केपी शर्मा ओलीले बुधबार सरकार गठनको १०० दिन पुगेको अवसरमा सम्बोधन गर्दै कीर्तिपुरस्थित मैदानमा फ्लडलाइट र प्यारापिट निमार्णको काम सुरु भएको बताएका हुन् ।

“क्रिकेट मैदान भएको तर आवश्यक पूर्वाधार नभएको गुनासोलाई सम्बोधन गर्न सरकार गठन भएलगत्तै हामीले तीन सय दिनभित्र कीर्तिपुरको क्रिकेट मैदानमा फ्लडलाइट जोड्ने, स्कोर बोर्ड राख्ने र राति पनि खेल्न मिल्नेगरी रंगशाला बनाउने निर्णय गरेका थियौँ,” प्रधानमन्त्री ओलीले भने, “कीर्तिपुर क्रिकेट रंगशालामा फ्लडलाइट जडान र प्यारापिट निर्माण गर्न शहरी विकास मन्त्रालय र राष्ट्रिय खेलकुद परिषद्बीच समझदारी भइ काम सुरु भएको छ ।” 

यसअघि असार ३१ गते ओली नेतृत्वको नयाँ मन्त्रिपरिषद्ले पहिलो निर्णयको रुपमा कीर्तिपुरस्थित मैदानमा फ्लडलाइट र प्यारापिट ३०० दिनभित्र बनाउने घोषणा गरेको थियो ।