काठमाडौं । राष्ट्रिय स्वतन्त्र पार्टी (रास्वपा)का प्रमुख सचेतक सन्तोष परियारले अदालतले रवि लामिछानेलाई बुधबार छाड्ने विश्वास गरेका छन् । सोमबार पोखरामा सञ्चारकर्मीसँग कुराकानी गर्दै परियारले अदालतप्रति रास्वपाको उच्च सम्मान रहेको र बुधबार अदालतले लामिछानेलाई जेलमा राखेर अनुसन्धान गर्नुपर्दैन भनेर छाड्ने विश्वास रहेको बताए ।

उनले नेपालको इतिहासमा खासखास समयमा अदालतले न्याय सम्पादन गरेको बताए । उनले सरकारले अदालतको न्यायप्रणालीलाई बिगार्ने काम गरेको आरोप पनि लगाए ।

"बुधबार कार्की अदालतले रवि लामिछानेलाई जेलमा राखेर अनुसन्धान गर्नुपर्ने केही छैन भनेर छाड्छ भन्ने विश्वास छ । अदालतप्रति विश्वस्त छौँ," उनले भने ।

प्रमुख सचेतक परियारले पोखरामा सबै बाहिरबाट पार्टीका कार्यकर्ता नआएको पनि जिकिर गरे । "अन्यायविरुद्ध बोल्न केही बाहिरबाट कार्यकर्ताहरू आउनुभएको छ । तर, बाहिर भनेजस्तो सबै साथीहरू बाहिरबाट आउनुभएको छैन । पोखरा रवि लामिछानेको पक्षमा एक दिन जुरुक्क उठ्ने छ । सरकारविरुद्ध लाग्नेछ । हाम्रो विश्वास अदालतप्रति छ तर सरकारप्रति छैन," उनले भने ।