काठमाडौं । ब्रिटिस काउन्सिलले नेपालमा दक्षिण एसिया केन्द्रित शिक्षामा भाषासम्बन्धी सम्मेलनको आयोजना गरेको छ । सम्मेलन सेप्टेम्बर १४–१५ मा काठमाडौंमा आयोजना गरेको हो । कार्यक्रमले नेपाल, भारत र पाकिस्तानका शिक्षाविद्, नीतिनिर्माता र अनुसन्धानकर्ताहरूलाई बालबालिकाको समग्र विकासमा भाषाले खेल्ने महत्त्वपूर्ण भूमिकालाई सम्बोधन गर्न एकताबद्ध गरेको जनाइएको छ ।

सम्मेलनको उद्देश्य सिकाइको आधारभूत तत्वको रूपमा भाषामा जोड दिने र शिक्षानीतिहरू व्यावहारिक र प्रभावकारी रूपमा कार्यान्वयन भएको सुनिश्चित गर्ने रहेको थियो ।

सम्मेलनमा छलफल गरिएका मुख्य विषयहरूमध्ये शिक्षा र सिकाइका उपलब्धिमा भाषाको महत्त्वपूर्ण प्रभावलाई जोड दिँदै भाषाहरूको भूमिकामाथि प्रकाश पारिएको थियो । सम्मेलनले नेपाल, भारत र पाकिस्तानमा भाषा–शिक्षा नीतिहरूको साझा बुझाइ निर्माण गरी स्थानीय नीतिहरू बुझ्नुपर्ने आवश्यकतालाई जोड दिएको जनाइएको छ ।

कार्यक्रममा यस क्षेत्रका सफल अभ्यासहरू साझा गर्ने र तिनको प्रभावकारिताका अन्तर्निहित कारणहरू पत्ता लगाउने, बहुभाषिक शिक्षा कार्यान्वयन गर्न विभिन्न दृष्टिकोणहरूबारे छलफल भएको थियो । यसबाहेक बहुभाषिक शिक्षाको अन्वेषणमा विभिन्न कार्यान्वयन रणनीतिहरू, तिनका लाभ र चुनौतीबारे छलफल गरिएको थियो । बहुभाषिक शिक्षा सन्दर्भमा अंग्रेजी भाषाको भूमिका पनि विश्लेषणको विषय थियो ।

"भाषा सिकाइ तथा बुझाइको लागि पुल हो । शिक्षामा परिचित भाषाहरूलाई प्राथमिकता दिएर, हामी बालबालिकाको पूर्ण क्षमतालाई उजागर गर्छौं र उनीहरूको सफलताको लागि मार्ग प्रशस्त गर्छौं । यो सम्मेलन दक्षिण एसियाभरि त्यस दृष्टिकोणलाई यथार्थमा परिणत गर्ने दिशामा एउटा महत्वपूर्ण कदम हो," ब्रिटिस काउन्सिल नेपालका अंग्रेजी प्रमुख भोगेन्द्र लामिछानेले भने ।