काठमाडौं । नेपाल बार एसोसियसनका अध्यक्ष गोपालकृष्ण घिमिरेविरुद्धकोअवहेलना मुद्दा सर्वोच्च अदालतका न्यायाधीशद्वय कुमार रेग्मी र कुमार चुडालको इजलासमा परेको छ । 

गएको असोज १४ गते नै अदालतको अवहेलना निवेदन दर्ता भएकोमा दसैँ बिदा सकेर अदालत खुलेपछि पेसीमा चढेको हो । अवहेलना निवेदन दर्ता गरेका उपरजिष्ट्रार गोविन्द्रप्रसाद घिमिरेले निवेदन फिर्ता लिने सार्वजनिक घोषणा गरिसकेका छन् ।

“म हिजोदेखि निदाउन सकेको छैन । जीवनभर प्रजातन्त्रको पछि लागियो । बा सधैँ यसकै लडाइ लड्नु भयो,” घिमिरेले फेसबुकमा लेखेका थिए, “बार जनताको आवाज हो । लोकतन्त्रको हिमायती हो । त्यसको नेतृत्वविरुद्ध मैले अवहेलनामा दिएको प्रतिवेदन फिर्ता लिएको जानकारी गराउँछु ।” उनले अदालत खुलेपछि आफ्ना कुरा राखेर निवेदन फिर्ता लिने पनि बताएका थिए ।

न्यायपरिषद् नियमावली संशोधनविरुद्ध आन्दोलनमा रहेको बारले निर्णय रोक्न गरेको प्रयास असफल पार्दै परिषद्ले असोज ११ मा सर्वोच्च अदालतका दुई न्यायाधीश नियुक्त गरेको थियो । उक्त नियुक्तिमा न्यायपरिषद्का अध्यक्षले लेनदेन गरेको आरोप बार अध्यक्ष घिमिरेले लगाएका थिए । उक्त भनाइले तत्कालीन समयमा प्रधानन्यायाधीश विश्वम्भरप्रसाद श्रेष्ठको मर्यादामा चोट पुगेको भन्दै घिमिरेविरुद्ध अवहेलनासम्बन्धी प्रतिवेदन दर्ता भएको थियो ।