काठमाडौं । प्रहरी महानिरीक्षक (आईजीपी) बसन्तबहादुर कुँवरले वर्षभरी विभिन्न विधामा उत्कृष्ट कार्य गर्ने प्रहरी कर्मचारीलाई पुरस्कृत गरेका छन् । ६९औं प्रहरी दिवस २०८१ का अवसरमा प्रहरी प्रधान कार्यालयमा आयोजित विशेष कार्यक्रममा उत्कृष्ट काम गर्ने प्रहरी कर्मचारीलाई पुरस्कृत गरेका हुन् ।

संगठीत अपराध अनुन्धान विधामा उत्कृष्ट काम गर्ने प्रहरी अधिकारीको पुरस्कार प्रहरी उपरीक्षक (एसपी) संजय सिंह थापालाई दिएको छ । थापाको नेतृत्वमा गएको साउनमा त्रिभुवन विमानस्थल हुँदै तस्करी गरी भित्र्याइको ६१ किलो सुनको अनुसन्धान भएको थियो । तर, उक्त सुन तस्करीबारे छानबिन गर्न बनेको समितिले भने अनुसन्धानमा कमजोरी देखाएको थियो ।

पूर्वन्यायाधीस डिल्लीराम आर्चाय नेतृत्वको समितिले अनुुसन्धान गर्ने प्रहरी अधिकारीलाई नै कारबाही सिफारिस गरेको थियो । तर, तथ्यबिना हचुवाको भरमा छानबिन समितिले प्रतिवेदन तयार पारेको भन्दै आलोचना भएपछि कार्यान्वयन नभइ थन्क्याइएको छ ।

समितिले कारबाही सिफासिर गरिएकामध्ये एआईजी किरण बज्राचार्यलाई समेत उपत्यका प्रहरी कार्यालयको कमाण्ड दिइएको छ । आईजीपी कुवँरले एसपी थापाबाहेक विभिन्न विधामा उत्कृष्ट काम गर्ने डीएसपी ईश्वर थापा, बरिष्ठ सई ऋषिकेश सुवेदी, सई निरीक्षक जीवनकुमार कार्की, सुवाष यादवलाई प्रशंसापत्र प्रदान गरेका थिए ।

उत्कृष्ट प्रहरी कार्यालय व्यवस्थापनतर्फ डीएसपी यमकुमार श्रेष्ठ, उच्च व्यावसायिक आचरणतर्फ डीएसपी पुरूषोत्तम खड्का, उत्कृष्ट ट्राफिक प्रहरीतर्फ प्रहरी निरीक्षक जितेश दाहाललाई पुरस्कृत गरिएको छ । अन्य प्रहरी अधिकारी पनि पुरस्कृत भएका छन्  ।

अवकाशपछि आफ्नो अनुभवसहितको रचनात्मक भूमिका निर्वाह गरेको भन्दै पूर्वएसपी चिन्तबहादुर बस्नेतलाई कदरपत्र प्रदान गरिएको छ ।